Елон Маск, основач на производителот на електро автомобили Тесла, синоќа во Лос Анџелес го презентира новиот автомобил наречен „Сајбертрак“. Автомобилот е пикап верзија на теренец за транспорт на патници и стоки и целосно е направен од челик со блиндирани стакла. Пред присутните на свеченоста повика вработен во компанијата да ја демонстрира издржливоста на шасијата и стаклата пришто автомобилот издржа удари со голем чекан – стаклото не се скрши, а на шасијата немаше длабнатини и гребнатини.
Носечката конструкција на електро пикапот е направена од ладновалан нерѓосувачки челик без нанесување боја наречен и „егзоскелет“. Истиот челик е употребен во ракетата „Старшип“ со која компанијата на Маск планира да испрати луѓе на Месечината и на Марс.
Стаклата, поставени одделно, пукнаа, но не се скршија ниту на тест за издржливост со употреба на голема метална топка што главниот конструктор, Франц фон Холцхаузен ја испушти од висина од неколку метри. И покрај тоа што тестот не успеа, Маск укажа дека топката се одбила и не завршила во внатрешноста на автомобилот. Истакна и дека шасијата на „Сајбертрак“ е непробојна за куршуми со калибар од 9 мм.
Автомобилот ќе се продава во три верзии, со еден, со два или со три електрични мотори. Во зависност од моделот, батериите ќе бидат со досег од 402, 482 и 805 километри. Пикапот со максимална дополнителна опрема може да постигне брзина од 96,6 километри на час за 2,9 секунди. Цената на најефтиниот модел е од 39,900 американски долари, додека тромоторниот ќе чини 69,900 долари. Производството на „Сајбертрак“ е планирано да започне кон крајот на 2021 година.
Тесла се обидува да привлече клиенти од најпобаруваниот сегмент на пазарот со автомобили во САД – теренските возила, каде примат имаат „Џенерал Моторс“, „Форд“ и „ФЦА“. Првите модели на електрични пикапи од „Форд“ и „Џи-Ем“ е планирано да се појават во продажба кон крајот на 2021 година.
На синоќешната презентација Маск изјави дека дизајнот на „Сајбертрак“ личи на модификувана верзија на автомобилот Лотус Еспирит од филмот со агентот Џемс Бонд „Шпионот кој ме сакаше“. Шасијата пак, обоена со ретки бои за нерѓосувачки челик, е слична на Делорен ДМЦ-12, автомобилот од трилогијата „Враќање во иднината“, чиј производиел подоцна банкротира.