Македонската репрезентација ќе мора по потешкиот пат по опстанок на 14. Европско првенство и пласман меѓу 12. најдобри на континентот. „Црвено-жолтите“ на стартот ја победија Украина со 26:25 по што следуваше пораз од Чешка со 25:27, па шансата за продолжување на престојот во Виена ќе се бара во утрешниот дуел од 18.15 часот против Австрија. За конечниот расплет во групата Б во оптек се шест опции. Австријците се наоѓаат во најповолна позиција по двата триумфа над Чешка со 32:29 и над Украина со 34:30. Но, и тие не се безбедни во желбата да се преселат во наредната фаза која носи три дополнителни средби на турнирот.
За Македонија да продолжи со настапите во „Винер Штадхале“ е потребна победа со намалку два гола разлика. Доколку се оствари, а притоа и Чешка ја совлада Украина, според сценаријата што ги објави и ЕХФ, Австријците ќе бидат елиминирани, а во топ 12 ќе одат македонските и чешките ракометари. Место во главната фаза ќе биде обезбедено и со триумф со гол разлика, но под услов, притоа, избраниците на Данило Брестовац да постигнат повеќе од 31 погодок. Во корист на македонскиот национален тим ќе оди и победа со 31:30, меѓутоа во тој случај и Чешка да не стави над Украина со поголема разлика од еден гол.
Опцијата ждрепка ќе биде активирана при победа на Македонија над Австрија со 31:30 и на Чешка над Украина со 26:25. Македонските ракометари ќе бидат во четвртфиналната фаза со било каков триумф над Австрија и пораз или реми на Чешка против Украина, а во прилог ќе биде и реми доколку Украинците ги совладаат Чесите.
„Против Австрија, секако, ќе моравме да играме, сеедно дали за подобар пласман во групата или за оваа ситуација дали ќе останеме или ќе си одиме. Чесите како да беа похрабри од нас, порешителни, преземаа одговорност и реализираа, за разлика од нас кои ги промашивме нашите шанси. Друг ќе беше сега муабетот ако реализиравме барем пола од нив“, вели Брестовац.
Вели дека одбраната ќе биде клучна за победникот во утрешниот меч со Австрија. Играта во дефанзива беше на ниво во првото полувреме против Чешка во кое противникот беше лимитиран на само девет гола, но продолжението на натпреварот донесе „распад на системот“, грешки и брзоплетост на моменти за што „црвено-жолтите“ беа казнети. Ниту 11-те гола на капитенот Кире Лазаров, сепак, не беа доволни за избегнување на поразот, оти покрај порозната одбрана во второто полувреме, во лошата вечер се вклопија и голманите Ристовски и Митревски кои завршија со само четири интервенции.
„Повеќе внимание на состаноците посветивме на одбраната и, горе-долу, повеќе ми чкрипи во нападот. Во Танкоски и Мишевски добивме плус двајца играчи во ротацијата, по еден во одбрана и во напад, но турнирот е краток да добиеме уште еден ракометар во случај да не им тргне на Кузмановски и на Талески. Преземам одговорност за секој потег што го влечам, но муислам дека засега е добро. Австрија е сосема поразлична репрезентација од Чешка. Имаат двајца шутери во Билик и Божовиќ, па затоа и пристапот ќе биде поинаков. Сè уште ништо не е загубено, се надевам дека ќе одиграме според договорот и на крајот ќе имаме причини за радост и задоволство“, коментира Брестовац.
Пласман во наредната групна фаза по два одиграни меча на шампионатот веќе обезбедија Норвешка, Хрватска и изненадувањето Португалија, а без шанси останаа селекциите Франција, на БиХ и на Србија.