Илјадници верници на Српската православна црква (СПЦ) и граѓани синоќа протестираа во повеќе црногорски градови против Законот за слобода на вероисповед. Литијата во Тиват ја предводеше Митрополитот црногорско-приморски, Амфилохие кој повторно побара повлекување на Законот.
„Нека падне овој закон за беззаконие или нека падне владата што го донесе“, истакна Амфилохие.
Литии во знак на протест поради Законот се одржаа и во Подгорица, во Пљевла, во Никшиќ, во Жабљак, во Бар, во Плужина, во Беране и во Бело Поле.
Законот за слобода на вероисповед беше усвоен на крајот на минатата година што беше причина за немири и во црногорскиот Парламентот. Притоа беа уапсени 18 членови на просрпскиот опозициски сојуз, а против тројца беа покренати кривични пријави. Оттогаш илјадници луѓе протестираат, како во Црна Гора, така и во Србија и Република Српска.
Најспорна одредба во законот се однесува на проверка на сопственоста на верските објекти. Законот предвидува дека верските објекти кои се изградени од јавни приходи на државата до 1 декември 1918 година, ќе станат државен имот, освен ако не постојат докази за сопственост на верската заедница на оние објекти што денес ги користат или се регистрирани како сопственици.
Со тоа црквите во Црна Гора мора да приложат доказ за сопственост над зградите и земјиштето што го поседувале пред 1918 година, а во спротивно им се заканува експропријација. На СПЦ ќе и биде тешко да даде докази за сопственоста на голем број стари имоти, бидејќи модерните катастри во регионот воглавно се воведени по 1918 година.