Published: Tuesday, March 10, 2020 10:24
Ве повикувам сите да се кренеме во напорите да си ја исчистиме земјата, затоа што е важно за сите нас, за нашите деца, за нашата иднина, затоа се ставаме во функција на обезбедување чист воздух и здрава животна средина, порача лидерот на СДСМ, Зоран Заев пред присутните на вчерашниот Конгрес на партијата на кој се официјализираа кандидатските листи за пратеници на претстојните предвремени парламентарни избори на 12 април.
Заев при тоа најави строги контроли и високи казни за загадувачите, комунална полиција во секоја општина и 24-часовен надзор врз инспекциските служби.
„Тројно повеќе еко-инспектори. Тројно повисоки казни за фабриките кои немаат еко филтри. Двојно повисоки казни за граѓаните кои загадуваат на законски недозволив начин“, нагласи Заев од говорницата во хотелот „Александар Палас“.
Тој истакна дека 60.000 домаќинства ќе добијат бесплатен еко инвертер во насока на забрана за употреба на фосилни горива, како дел од владината помош за граѓаните за современ и еколошки начин на загревање.
„Обезбедуваме субвенции за приклучување на централно греење и за набавка на филтри на оџаците на домаќинствата. Гасот пристигнува до семејствата, а данокот за увоз на електрични и хидрогенски возила го укинуваме. Сите, ама буквално сите сме одговорни за животната средина“, истакна првиот човек на социјалдемократите.
Заев, меѓу другото, нагласи воведување на задолжителни часови по хигиена во основното образование, задолжително сепарирање на отпадот за домаќинствата, но и масовни акции за чистење и пошумување на јавните површини со ангажман на институциите и на граѓаните.