Вкупно 74 946 македонски граѓани во последните десет години земале државјанство на некоја од земјите во Европа, при што омилени дестинации се Италија, Швајцарија и Германија, покажуваат податоците на Евростат.
Само во 2018 година, земјите од Европската Унија издале вкупно 672.270 државјанства на граѓани од други земји, најмногу на жители од Мароко – 67.156, потоа од Албанија – 47.441 и од Турција – 28.386.
Од нашата земја во 2018 година, вкупно 7.627 граѓани зеле државјанство на некоја од државите во Европа. Најголемиот дел од нив во Италија – 3.487, потоа во Швајцарија – 1.606 и Германија – 945.
Ова е намалување за 450 лица во споредба со 2017 година во која 8.077 македонски граѓани земале државјанства на земји од ЕУ.
Во последните десет години, вкупно 29.428 македонски граѓани земале италијанско државјанство. Околу 14.000 тоа го сториле во последните три години од кои рекордни 6.771 во 2016 година.
По Италија, омилени земја за македонските граѓани биле Швајцарија и Германија каде во последните 10 години се иселиле по 16.935, односно 9.333 граѓани.
Во извештајот на Евростат се наведува и податокот дека во 2008 година, најголем број државјанства македонските граѓани земале на Бугарија – 3.637, по што нагло се намалува статистичкиот број и се движи од 200 до 400 граѓани.
Од регионот најмногу државјани во 2018 година загубила Албанија – 47.441 жител. Најголем дел од нив (51 процент) зеле државјанство во Грција, а 46 проценти од Италија.
Вкупно 8.693 жители на Србија во 2018 година земале државјанства на земји од ЕУ – најмногу (28,5 проценти) на Германија, на Италија (23,5 проценти) и на Шведска (14,6 проценти).
Од Косово вкупно 7.979 граѓани се преселиле во ЕУ, најмногу (48,2 проценти) во Германија, потоа во Италија (27,1 проценти) и во Австрија (7,1 проценти).