Веста за отворање на основните и средни училиштата на 18 мај и продолжување со настава што се шири на социјалните мрежи е лажна, објави министерот за образование и наука, Арбер Адеми на својот Фејсбук налог.
Најбрзо потоа се огласи и Министерството за образование и наука преку соопштение ја демантира информацијата која денеска е објавена во дел од медиумите за наводно усвоена Уредба од страна на Владата со која основните и средните училишта во Република Северна Македонија продолжуваат со работа на 18 мај.
Од МОН информираат дека се работи за лажна информација и документ, кој воопшто не е подготвен и усвоен од Владата, а оваа тема не била предмет на дискусија на владините седници во изминатите денови.
За сите одлуки кои институциите на системот координирано ги носат за време на вонредната состојба, посочуваат од МОН, јавноста е секогаш навремено информирана од страна на службите задолжени за односи со јавност.
Од МОН апелираат да не се креираат и шират лажни вести, бидејќи тоа не оди во прилог на заедничката заложба за справување со актуелната состојба и создава дополнителна вознемиреност кај граѓаните во овој исклучително тежок период за сите нас.