Веднаш штом се стабилизира епидемијата, а сме оптимисти дека брзо ќе се случи, треба да се реализираат изборите, во првиот можен рок. Во моментот кога епидемиолозите и здравствените авторитети ќе проценат дека има услови за враќање на општествените текови во функција, изборите треба да станат реалност, што поскоро, истакна генералниот секретар на СДСМ, Љупчо Николовски.
Од здравствен аспект, како што наведува, најдобро е демократскиот избор на новиот македонски парламент и на новата македонска политичка влада со целокупна одговорност, да се случи во период кога короновирусот е совладан и, секако, пред евентуална нова закана од повторно ширење на вирусот.
Николовски потсетува дека борбата со пандемијата, непосредно пред стартот на предизборната кампања, принудно го стопира изборниот процес, речиси на крај од сите изборни дејствија што беа спроведени од страна на Државната изборна комисија (ДИК), а Собранието не е во функција.
„Денеска, по онлајн координацијата со шефовите на регионалните изборни штабови на СДСМ, дојдовме до заеднички заклучоци во име на партијата, на Централниот изборен штаб и во име на регионалните и општински изборни штабови во шесте изборни едници. Демократијата бара Собранието да ја контролира извршната власт и да биде на располагање за нови одлуки, со полн мандат од граѓаните. Тоа е причина повеќе да продолжиме по патот на обезбедување на новата нормалност, која веќе сите ја живееме. И веднаш штом здравството и епидемиолозите потврдат дека вирусот е под целосна контрола, треба да продолжи изборниот процес и изборните дејствија, онаму каде што застана на 12 април за веќе закажаните избори“, вели Николовски.
Генералниот секретар на СДСМ нагласи оти на сите е јасно „дека преоѓаме во нова фаза, кога одиме кон нова нормалност на нашето живеење, нашето ново секојдневие“. Но, притоа апелира до граѓаните за уште поголема внимателност и посветеност при почитувањето на мерките и препораките.
„Само ако носиме заштитни маски и ако се држиме на два метра дистанца ќе можеме полека да го вратиме јавниот транспорт во поголема функционалност, компаниите ќе се вратат во погон, а наскоро ќе може да се активираат и дел од угостителските капацитети. Само на овој начин, преку обезбедена епидемиолошка контрола, преку строги протоколи за новата нормалност и преку обезбедена заштита на јавното здравје, ќе може да зборуваме и за избори“, порача Николовски.
Според него, „граѓаните прават јасна разлика меѓу одговорниот пристап и неодговорноста.
„Во меморијата на секој од нас остана онаа срамна изјава на Мицкоски на крајот од февруари оваа година. Мицкоски кажа дека „од СДСМ молела бога да се случи коронавирус за да не може ВМРО-ДПМНЕ да излегува со народот на протести. Тогаш ја исмеваше и ја потценуваше оваа пандемија и криза. Што е тоа што го натера Мицкоски да добие уплав од избори после 2 месеци? – Неговите неуспешни напори да го одложи членството во НАТО, да не добиеме одлука за почеток на преговори со ЕУ или неговите подметнувања и желби, здравствените институциите да не успеат во справувањето со епидемијата?“, јавно праша Николовски.
Тој ги повтори и ставовите на партијата при поднесување на иницијативата за свикување на итна седница на Собранието на што опозицијата се спротивстави дека „ВМРО-ДПМНЕ и Христијан Мицкоски покажале крајно неодговорно однесување во клучни моменти по здравјето на македонските граѓани, се свесни за тоа и затоа бегаат од секој еден демократски мегдан. Затоа не сакаат да функционира Собранието и парламентот, затоа не сакаат нормализација и избори“.