Секој потег, секоја одлука и секоја политика на СДСМ е и ќе биде исклучиво во функција на граѓаните, во интерес на државата. За нас најважни се граѓанитe. Секое одлагање на изборите подалеку од крајот на јуни е туркање на земјата во голема политичка, економска и здравствена криза, истакна Љупќо Николовски, генерален секретар на СДСМ.
„Сите досегашни параметри укажуваат дека епидемијата е ставена под контрола. Македонското јавно здравство одлично се справи со досегашниот тек на епидемијата. Го заштитивме здравјето на граѓаните и ја вративме довербата во институциите. Веќе го живееме новото нормално“, порача Николовски.
Според него, време е таа нова нормалност на здравствен, економски, но и демократски план да се обезбеди.
„За нова и брза трансформација на економијата и целосно функционални институции кои се гарант за силна демократија, потребни се избори во првиот можен термин. Предвремените парламентарни избори кои веќе се распишани и еднаш одложени, треба да се одржат во првиот можен термин, а предизборната кампања да биде усогласена со заштитните протоколи и епидемиолошките стандарди, особено денот на изборите“, наведе генералниот секретар на владеачката партија.
Протоколите со заштитни мерки за средби, состаноци, курсеви се веќе објавени од Комисијата и усвоени од Владата. На денешната прес-конференција, министерот за здравство Венко Филипче истакна дека е изготвен и Протокол за изборниот процес, за спроведување на кампања и за одржување на самиот процес на гласање.
„Сите ќе се построиме по нив и ќе спроведеме најпрофесионални избори со сите заштитни механизми. Гласачкото место ќе биде најстрого обезбедено со сите заштитни мерки. Сакаме избори кога вирусот е најмногу под контрола, со највисоки мерки на заштита и без ризик по здравјето, со цел да воспоставиме нормална работа на парламентот и владата и да можеме да се втурнеме си сите сили во рестарт на економијата“, истакна Николовски.
За лидерот на ВМРО-ДПМНЕ, Христијан Мицкоски и опозициската партија рече „бегаат од избори и се плашат од соочување со граѓаните. Сакаат неизвесност, нефункционални институции, криза и закани по граѓаните. Тоа нема да го дозволиме“.
„Нема да дозволиме нивното неодговорно однесување да ја втурне земјата во лош правец. Исто како што не дозволивме тоа да се случи и за време на здравствената криза. Мицкоски лажеше дека нема доволно тестови, изјавуваше дека СДСМ ја посакувала здравствената криза, поднесуваше кривични пријави против Венко Филипче, ширеше невистини додека целата јавност ги гледаше неговите слики од теретана и прошетки на Водно. Дури и прогласувањето втора вонредна состојба Мицкоски ја оцени како противуставна“, рече Николовски.
За Мицкоски порача оти „знае дека нема да стане ниту мандатар, ниту премиер, знае дека ВМРО-ДПМНЕ ќе ги изгуби изборите кога и да се одржат“ и најави дека „наредната недела нема бегање, одредуваме датум за избори“.