Министерот за здравство Венко Филипче најави смена на директорот на Центарот за Јавно Здравје Скопје, Арбен Зибери по неговиот пост на Фејсбук дека „границите се отвораат за иселениците да може да дојдат и да гласаат за премиер Албанец“. Тоа за Филипче е „лоша и евтина предизборна реторика“ и по консултации со правници, најави негово можно разрешување уште во текот на денот, а го демантира дека е член на Комисијата за заразни болести.
„Прво морам да кажам дека директорот на Центарот за Јавно Здравје, Зибери не е член на Комисијата за заразни болести. Неговиот пост го сметам за некаква предизборна реторика која е лоша и евтина и не гледам дека ќе добие нешто со неа. Сиот изминат период, Комисијата за заразни болести работи врз основа на медицински индикатори, на епидемиологија и на медицината како наука. Таква изјава не доликува на доктор и особено на човек кој раководи со таква институција. Ќе се консултирам со правници и доколку е можно во овој период, Зибери ќе биде сменет уште во текот на денот“, нагласи Филипче.
Зибери во постот на Фејсбук упати порака до иселениците дека може да си дојдат дома без задолжителен ПЦР тест и карантин што го припиша како свој придонес и придонес на ДУИ.
„Зошто да не дојдете дома за Албанец премиер“, заклучи Зибери во објавата на Фејсбук.