Со изработка на мурал на фасадата на Домот на култура во населбата Ченто во Скопје, продолжува програмата на јубилејното 15. издание на „АКТО фестивал“ за современи уметности, во продукција на организацијата „Факултет за работи што не се учат“ (ФР~У). Автор на муралот е младиот уметник Владимир Милиќ и во продукција е на ФР~У во партнерство со организацијата „Културно Ехо“, Општина Гази Баба и Град Скопје.
По минатонеделното отворање на 15. „АКТО фестивал“ со муралот во Битола на колективот КУРС од Белград, АКТО продолжува со интервенции во други градови низ државата во соработка со локалните заедници и различни партнери.
Идејата за мурал во Ченто е во правец на соработка и активирање на оваа локална заедница во продукција на културни настани за заедницата, но и во насока на зачувување и ставање во функција на Домот на култура во населбата. Муралот, пак, е развиен како неколкумесечен процес на работа на уметникот Владимир Милиќ од Ченто со пошироката локална заедница и се однесува на потенцирање на важноста на солидарноста особено во овој дел од населбата.