Екипите на јавни градски претпријатија се излезени на терен и интервенираат по невремето што го зафати Скопје. Од ЈП „Паркови и зеленило“ за МИА информираат дека денеска паднала врба врз автомобил во Автокоманда што по интервенцијата е отстранета.
Вчера, пак, се интервенирало на улица „Вич“ во Карпош 4, спроти градинката „Орце Николов“, каде, исто така, имало пријава за паднато дрво. Имало интервенција и во Карпош 2, на улица „Шекспирова“ каде имало паднати гранки кои се отстранети во текот на вчерашниот ден. Во Ѓорче Петров, кај Пазарчето, на улица „Македонска војска“ исто така имало паднато дрво, а во текот на вчерашниот ден екипите интервенирале и на Водно, во близина на амбасадите, каде имало паднати и искршени гранки.
Поради најавите за обилни врнежи проследени со силен ветар и грмотевици во скопскиот регион до крајот на неделава, од „Паркови и зеленило“ ги предупредуваат граѓаните на претпазливост и да внимаваат да не ги паркираат своите возила под високите дрвја, со цел да се избегне настанување на штети и несакани последици.
Од ЈП „Водовод и канализација“ за МИА информираа дека на терен нема поголеми интервенции поради невремето. Екипите се излезени на време и сега засега не е предизвикан застој во движењето. Во тек се активности за расчистување и непречено функционирање на атмосферската канализациска мрежа што, според ќе продолжат и денеска, со расчистување и проверка на функционалноста на сливниците и шахтите во сите општини на територијата на Град Скопје.
Како што соопшти Управата за хидрометеоролошки работи (УХМР), најмногу дожд до осум часот изутрина наврнал во Демир Капија каде се измерени 59 литри на метар квадратен, како и во Скопје-Петровец – 54 литри и во Охрид – 50 литри.
УХМР за денеска најавува претежно облачно време со чести врнежи од дожд. Локално ќе има развој на нестабилна облачност со пороен дожд, грмежи и засилен ветар. Во текот на денот, како и во текот на ноќта повторно се очекува да наврне поголема количина на воден талог што на места ќе достигне до 35 литри на метар квадратен.
Времето во Скопје ќе биде претежно облачно со повремени врнежи од дожд, а попладне и нестабилно со пороен дожд и грмежи. Максималната температура ќе достигне до 25 степени.
Во наредните денови ќе продолжи период на променливо облачно, нестабилно и посвежо време со повремени врнежи од дожд и грмежи. Локално процесите ќе бидат поинтензивни во форма на невреме со силен ветер, електрични празнења и изолирана појава на град.