Епидемијата на Ковид-19 во Индија се стабилизира во некои делови на земјата, соопштија денеска локалните власти, но бројот починати денеска се зголеми за 4.194, а заразата продолжува да се шири во руралните области каде што јавните здравствени служби се преоптоварени.
Индија на почетокот на мај пријавуваше повеќе од 400.000 заразени на ден, денеска пак се евидентирани 257.299 нови случаи.
Бројот на активни случаи во последните две недели падна во најбогатата држава Махараштра, потоа во Карнатака, Бенгалуру, како и во крајбрежната држава Керала, но се зголемува дневниот број на заразени во Западен Бенгал, Андра Прадеш и Тамил Наду.
Со преполни болници, здравствени системи и недостиг на вакцини, експертите предупредуваат дека Индија може да се соочи со трет бран на зараза во наредните месеци.
Вкупниот број на случаи во Индија е 26,3 милиони, со што земјата е втора во светот по САД, додека вкупниот број на смртни случаи изнесува 295.525.