Здравствените власти во земјава сметаат дека учениците можат да се вратат во училиштата од септември, а за две недели целосно ќе бидат завршени протоколите за новата учебна година. Ресорниот министер Венко Филипче уверува дека протоколите за учебната година се речиси готови.
– Има уште некои технички детали, на кои е посветена работната група, во која членуваат претставници од МОН и епидемиолози од Комисијата за заразни болести. Планирано е да присуствуваат сите деца, 100 проценти од вкупниот број во класовите. Така се подготвуваат и протоколите. Мерките се: дезинфекција, често проветрување на училниците, немешање на различни класови. Протоколите ќе бидат целосно завршени за две недели, изјави Филипче.
Соопшти дека со пристигнувањето на големата количина вакцини викендов, се планира и имунизација на сите наставници.
Во однос на индискиот сој на вирусот, можно е тој да ја смени епидемиолошката слика, но според здравствените власти, вакцинираните лица кои евентуално би заболеле од него, нема да имаат тежок облик на болеста. Состојбата на двајцата пациенти заболени од индискиот сој на вирусот е добра.
Податоците што вчера ги објави Министерството за здравство за претходните 24 часа покажуваат дека продолжува трендот со мал број заразени со коронавирусот. Од направени 2.466 тестирања, регистрирани се пет нови случаи на ковид-19, осум оздравени пациенти и едно починато лице. Бројот на активни случаи, заклучно со вчерашниот ден изнесува 251.
Според епидемиолошки анализи, во Скопје има вкупно 92 активни случаи, во Куманово – 34, во Тетово – 24, во Прилеп – 22, Охрид и Кичево по 16, итн. Без активни случаи се 12 градови во земјава – Кавадарци, Неготино, Свети Николе, Ресен, Берово, Пробиштип, Валандово, Богданци, Демир Капија, Пехчево, Македонска Каменица и Дојран.
Досега во земјата се направени вкупно 861.692 тестирања за ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 155.645, бројката на оздравени пациенти е 149.916, на починати е 5.478.
Од Министерството за здравство информираат дека досега во државата вкупно се аплицирани 488.010 дози вакцини, а ревакцинирани се 206.163 граѓани. Со последните бројки, како што велат, 51 отсто од населението над 70 години имаат примено барем една доза на вакцина, 45 отсто од населението над 65 години е вакцинирано со барем една доза на вакцина и 38 отсто од населението над 60 години е вакцинирано со барем една доза на вакцина.
Според здравствените власти, за да се постигне колективен имунитет е потребно да се вакцинирани 60 до 70 проценти од населението. Во пресметката не се внесуваат оние 150.000 граѓани кои го прележале вирусот оти не се знае дали некои од тие се вакцинирани, ниту пак колкав е точно нивниот број.