Откако пратеникот на ДОМ, Мирослав Богдановски, поднесе оставка, којашто е констатирана и потврдена од страна на ДИК, партијата СДСМ од денеска се очекува да има пратеник плус во Собранието, односно во пратеничката група.
Станува збор за пратеничката Даниела Николова, која е на 13 место на листата на СДСМ во првата изборна единица.
На денешната собраниска седница на дневен ред е и констатација на оставката на пратеникот Мирослав Богдановски од ДОМ, а се очекува ДИК да го предложи следниот пратеник.
Пратеничката и претседателка на ДОМ, Маја Морачанин во денешното гостување на Утрински брифинг изјави дека во ДОМ се уште има внатрепартиски разлики, и тоа не е ништо ништо страшно ако постојат различни мислења, одговарајќи за актуелните внатрепартиски превирања.
-Денеска од собраниските служби сум известена дека пратеникот Мирослав Богдановски си поднел оставка од Парламентот. Јас не сум ја видела, но имаме седница на Парламентот и веројатно ќе биде ставена да се констатира на пленарна собраниска седница, тоа е процедурата, рече Морачанин.
Таа додаде дека „веројатно Богдановски ќе си ги образложи причините за оставката“.
Богдановски претходно со раководството на ДОМ имаше несогласувања и најави дека ќе дејствува независно во Собранието.
Tој, во изјава за „Фокус“, денеска најави дека се враќа на старото работно место- главен инспектор во Град Скопје.
– Се враќам на старото работно место, се враќам на терен, за да ја споведеме зелената политика и да ја продолжиме борбата против загадувачите. Тоа е единствената причина за мојата оставка од пратеничката позиција – изјавил Богдановски.