Турската крајбрежна стража уапси повеќе од 200 илегални мигранти, меѓу кои Авганистанци и Сиријци, кои се подготвуваа да преминат преку Егејското Море со рибарски брод за да стигнат до Грција, објавија денеска локалните медиуми.
Тоа е најголемата група илегални мигранти уапсени од властите оваа година, што го одразува зголемувањето на бројот на луѓе кои бараат засолниште во Европа по затишјето во пандемијата на коронавирусот.
Турските власти уапсија точно 231 мигрант од Авганистан, Сирија, Иран, Еритреја, Јемен и Пакистан. Мигрантите беа уапсени во близина на селото Ајваџик, недалеку од грчкиот остров Лезбос.
Уапсени се и двајца осомничени шверцери на кои им се исплаќале од 5.000 до 6.000 евра по мигрант за да ги префрлат во Италија.
Мигрантите често ја користат Турција како транзитна рута кон земјите од Европската унија, претежно преку Грција. Честопати, потпирајќи се на шверцери, патуваат во преполни чамци.
Во 2016 година, Турција потпиша договор со Европската унија за ограничување на протокот на мигранти кон Европа во замена за финансиска помош од шест милијарди евра.
Турција би сакала да го ажурира договорот поради ризикот од прилив на авганистански бегалци по повлекувањето на американските сили од Авганистан.