Централната Влада во Кабул вчера мирно ја предаде власта на претставници на талибанците кои влегоа во претседателската палата во Кабул со што заврши дведецениското владеење на националната влада со поддршка на САД. Една група од нив објави фотографии на социјалните мрежи од внатрешноста на објектот и наведе дека тие имаат контрола врз 11 од 15 реони во градот.
Големата офанзива врз Кабул започна во петокот кога талибанските сили беа на само 40 километри од предградијата на главниот град на Авганистан. Во текот на ноќта од сабота, 14 август до недела, 15 август, талибанците влегоа во предградија на Кабул и ги блокираа сите излези од градот.
По повеќечасовни разговори меѓу претставници на талибанците и претседателот Ашраф Гани во претседателската палата во Авганистан, талибанците објавија дека ја преземаат власта и дека негов наследник на функцијата ќе биде водачот на талибанската организација Мула Абдул Гани Барадар. Гани го напушти Авганистан и се упати во Таџикистан, но според британски медиуми се очекува денеска да потпише предавање на власта.
Висок претставник на авганистанското Министерство за внатрешни работи изјави дека талибанците пристигнуваат во главниот град „од сите страни“. Аеродромот во Кабул е нападнат и се слушаа истрели. Амбасадата на САД издаде предупредување до своите граѓани „да најдат засолниште и да чекаат“.
Ситуацијата во Кабул брзо се менува, како и ситуацијата на аеродромот, објавија тие.
Болницата во Кабул соопшти дека најмалку 40 лица се повредени во борбите во предградија на Кабул.
Претставник на талибанците нагласи дека ќе објават создавање на Исламски Емират на Авганистан, јавија американски медиуми. Тоа беше името на државата под талибанска власт од 1996 до 2001 година
Поранешниот авганистански министер за внатрешни работи, Али Ахмад Џалали ја презеде функцијата премиер на преодната влада во државата, јави ТВ „Ал Арабија“.
Според дипломатски извори, поранешниот министер за внатрешни работи е „избран за премиер на преодната влада“ и презел функција на шеф на преоданата админстрација.
УНХЦР на 14 август објави дека жените сочинуваат околу 80 отсто од вкупниот број на авганистански бегалци. Меѓу мај и јули се регистрирани речиси 250.000 бегалци.
Американскиот државен секретар Ентони Блинкен рече дека Вашингтон инвестирал милијарди долари во авганистанските владини сили за време на четири американски администрации, давајќи им предност пред талибанците, но тие не успеаја да го спречат нивниот воен напредок.
Факт е дека сме сведоци оти авганистанските сили не беа во можност да ја бранат земјата. И тоа се случи побрзо отколку што очекувавме, рече Блинкен.
Блинкен отфрли каква било споредба меѓу моменталната ситуација во Кабул и падот на Сајгон во Виетнам во 1975 година, истакнувајќи дека САД „ги постигнаа воените цели“ во Авганистан.
Британскиот премиер Борис Џoнсон изјави дека негов „приоритет“ е евакуацијата на британските граѓани од Авганистан и ги повика западните земји да усвојат унифициран пристап пред каква било акција.
Џонсон вчера одржа состанок на таканаречениот министерски тим Кобра, втор за три дена на тема Авганистан. Тој рече дека приоритет на Велика Британија е да ги исполни своите обврски кон британските граѓани и оние кои придонесоа за британските напори во Авганистан во текот на изминатите 20 години, но нагласи оти владата има средства за евакуација на своите граѓани во следните неколку дена.
Амбасадорот беше таму на аеродромот за да ги обработи апликациите. Ситуацијата останува многу тешка и јасно е дека ќе има нова влада во Кабул, рече Џонсон.
Тој додаде дека Велика Британија ќе работи со своите партнери во Советот за безбедност на ОН и рече дека не сака некој еднострано да ги признае талибанците.
Сакаме заедничка позиција да направиме сè што е во наша моќ за да избегнеме повторно да го направиме Авганистан плодна почва за тероризам,
Американската разузнавачка проценка од претходнaта седмица беше дека Кабул може да биде заземен за 30 дена и може да падне во рацете на талибанците во рок од 90 денови.