Во водите на Охридското Езеро во моментот се одржува јубилејното 50-то издание на Охридски пливачки маратон, прва од четирите трки во Серијата ултра пливачки маратони на Светската пливачка федерација (ФИНА).
Пливачите влегоа во езерото во 11 часот кај Свети Наум, а првите маратонци на целта кај Градското пристаниште во Охрид, оддалечено 25 километри, се очекува да стигнат за приближно шест часа.
Временските услови за маратонот се поволни, температурата на водата е 25 Целзиусови степени, но мал проблем претставува умерениот северен ветар што го бранува езерото и дува спротивно од насоката на пливањето.
Меѓу 12 пливачи и седум пливачки учесници на маратонот се неколку познати имиња, како Марк Антоан Оливие од Франција, светски шампион на пет километри, бронзен од Олимиписките игри во Рио де Жанеиро и шестопласиран на Олимпијадата во Токио, потоа неговиот сонародник Аксел Рејмонд, светски шампион на 25 километри за 2019 година, како и нашиот Евгениј Поп Ацев, победник на ФИНА Светската серија на Ултра маратони во 2019 година. Од нашите маратонци во водите на езерото влезе и Александар Илиевски.
Кај жените на стартот, меѓу познатите се освојувачката на сребро на десеткилометрскиот маратон во Доха – Ошан Касињол, како и ветеранката и нам добро позната неколкукратна победничка на охридскиот маратон – Пилар Гељо од Аргентина.
Наградниот фонд на пливачкиот маратон изнесува 10.000 долари, рамномерно распореден во двете категории.
Првиот Ултра маратон што требаше да се одржи во Канада е откажан, додека по охридскиот ќе следуваат уште две трки – на патеката Капри во Италија и Росарио во Аргентина.
Ова е 50-ти пат светската пливачка елита да се собере на Охридското Езеро, а 35-та трка од возобновувањето на Охридскиот пливачки маратон.