Пакистан привремено го затвори клучниот граничен премин Чаман со Авганистан, јави агенцијата ДПА. Мерката доаѓа во услови на зголемен прилив на бегалци кои бегаат од талибанската власт во нивната земја.
Министерот за внатрешни работи на Пакистан рече дека одлуката се однесува на граничниот премин Чаман, но не прецизира колку долго ќе се затвори границата. Преминот Чаман ја поврзува југозападната провинција Балучистан во Пакистан со Спин Болдак во авганистанската провинција Кандахар, упориште на талибанците.
Илјадници бегалци секој ден ја минуваат границата преку Чаман, откако талибанците ја презедоа власта во Авганистан минатиот месец.
Пакистан, дом на 2,7 милиони авганистански бегалци кои побегнаа во 1970-те, соопшти дека не може да си дозволи нов прилив на мигранти поради економски и социјални проблеми. Се очекува најмалку 800.000 нови бегалци да дојдат во Пакистан по копно.
Пакистан има околу десетина контролни пунктови долж границата со Авганистан со должина од 2.500 километри. Торкам, вториот по големина граничен премин што го поврзува северозападниот град Пешавар со Нангархар во Авганистан, сега е затворен.