Можно е да има и повеќе загинати, но засега официјално не може да биде потврдено. Ова е многу тажен ден. Лекарите се борат за животите на повредените, да им посакаме среќа и да останеме со мислите со нашите сограѓани вечерва. Апелирам до медиумите и граѓаните да не се шпекулира со бројките. Сите потврдени информации навреме ќе ги споделиме. Изразувам сочувство до семејствата, соопшти Филипче.
Итна седница на Кризниот штаб се одржува во Тетово по страотниот пожар кој избувна вечерва во 21 часот и 2 минути, а во кој за неполни 40 минути изгоре ковид центарот во тетовската Клиничка болница.
Министрот Филипче предмалку на Твитер потврди дека досега биле потврдени 10 жртви во пожарот.
„Можно е да има и повеќе загинати, но засега официјално не може да биде потврдено. Ова е многу тажен ден. Лекарите се борат за животите на повредените, да им посакаме среќа и да останеме со мислите со нашите сограѓани вечерва. Апелирам до медиумите и граѓаните да не се шпекулира со бројките. Сите потврдени информации навреме ќе ги споделиме. Изразувам сочувство до семејствата“, соопшти Филипче.
Во центарот, според неофицијални информации, биле хоспитализирани повеќе од 20 пациенти, за коишто се грижеле десеттина вработени.
Според информациите, на седницата на Кризниот штаб, која се одржува во зградата на Општина Тетово, присутни се премирот Зоран Заев, првиот вице-премиер Артан Груби, министрите Венко Филипче, Љупчо Николовски, Аријанит Хоџа, Оливер Спасовски и други.
Се очекува во секој момент да заврши седницата, по што ќе бидат соопштени најновите сознанија за бројот на жртвите и повредените во пожарот во ковид центарот.
Министерството за здравство пред повеќе од еден час потврди дека има жртви во страотниот пожар во центарот.
„На готовс“ се и вработените на скопските клиники, каде се очекува да бидат пренесени некои од повредените пациенти.
Според последните информации, сепак нема да има изјави по седницата на Кризниот штаб, како што кажа вечерва, 15ина минути по полноќ, градоначалничката на Тетово, Теута Арифи.