Во двете општини, во кои лидерот на Алијанса за Албанците, Зијадин Села, синоќа прогласи победа во првиот круг, кандидатите на коалицијата Алијанса-Алтернатива се многу блиску до неопходното мнозинство, но остануваат под 50% плус еден глас.
Во Гостивар и Дебар, сепак, ќе има и втор круг за избор на градоначалник, покажуваат првичните резултати од Државната изборна комисија (ДИК).
Иако лидерот на Алијанса за Албанците, Зијадин Села, синоќа прогласи победа уште во првиот круг, кандидатите на Алијанса за Албанците и Алтернатива, сепак не освоиле мнозинство од гласовите на граѓаните коишто вчера излегле на избирачките места, па извесно е дека и во Гостивар и во Дебар, ќе има гласање и во вториот круг од локалните избори кој ќе се одржи на 31 октомври.
Според првичните и неофицијални резултати на ДИК, во Гостивар гласале 31. 524 граѓани, од кои Таравари освоил 15. 724 односно 49,88 отсто, а за кандидатот на ДУИ, Невзет Бејта, гласале 13. 190 гостиварци или 41,84 отсто. Бејта брои за 2. 534 гласови помалку од Таравари.
Трет е кандидатот на Беса, Фадил Зендели, кој освоил 909 гласа, а за Рената Елези од ДПА гласале 333 граѓани. Во оваа општина биле избројани и 1. 368 неважечки ливчиња.
По пребројани сите 8 046 гласови во Дебар, неофицијалните резултати велат дека кандидатот на Алијанса за Албанците и Алтернатива, Беким Поцеста, освоил 3. 998 или 49,69 отсто од гласовите. Додека актуелниот градоначалник и кандидат на ДУИ, Хекуран Дука, освоил 285 гласа помалку, односно 3. 713, што е 46,15 отсто.
Кандидатот на ДПА во Дебар, Петрит Клења, кој е трет, освоил 37 гласови.
(Извор: ДИК)