Најмалку шест лица загинаа, а 11 се ранети во двоен самоубиствен бомбашки напад пред машко училиште во авганистанската престолнина Кабул.
Експлозиите се случија во гимназијата Абдул Рахим Шахид во западниот дел од градот во кој доминираат Шиитите. Бројот на загинати и ранети најверојатно ќе се зголеми.
Цел на напад со гранати бил и блискиот школски центар. Засега никој нема преземено одговорност за нападите.
Извори од болницата Мухамед Али Џина во Кабул за Би-Би-Си изјавија дека досега примиле четири мртви тела и 19 повредени лица од нападот во училиштето.
Фотографиите од последиците од експлозиите покажуваат крвави дамки на земјата покрај фрлените тетратки.
Областа во која се случија нападите – Дашт-е-Барчи – често беше цел на напади од локалниот огранок на групата Исламска држава поради нејзиното главно шиитско муслиманско население Хазара.
Хазарите се етничко и верско малцинство кое често е цел на сунитските милитантни групи, кои ги сметаат за еретици.
Локалните извори, исто така, соопштија дека рачна граната била фрлена во блискиот школски центар за студенти кои се подготвувале за приемен испит на универзитетот. (Би-Би-Си)