Претседателот Стево Пендаровски ги нарече лага и гола конструкција последните тврдења на бугарскиот претседател Румен Радев дека во Македонија биле убиени 10.000 Бугари по Втората светска војна.
„Бројката од наводно убиени 10.000 Бугари е лага, гола конструкција за политички цели. Не постои ни еден релевантен историски извор, ни во бугарската, ни во македонската, ниво светска историографија дека 10.000 луѓе биле убиени во концентрациони логори во тоа време кај нас. Нешто што може да влезе во таа дефиниција на концлогор постоело во Хрватска на Голи Оток. На територијата на Македонија никогаш немало конц-логори ни тогаш, ни денес“, рече Пендаровски.
Бугарскиот претседател претходно за бугарските медиуми рече дека „обидите на македонските политичари да изградат идентитет врз основа на фалсификатите на Комунистичката интернационала се против интересите на граѓаните на РМ кои сакаат членство во ЕУ.
-Ако зборуваме за фашизам, треба да биде јасно дека Иван Михаилов го одби Хитлер да ја вклучи Македонија во братоубиствена војна со Бугарија. Не беше Иван Михаилов, туку други луѓе кои убија десетици илјади во концентрационите логори за време на воспоставувањето на југословенската диктатура во Македонија. Само затоа што решиле тие да се нарекуваат Бугари, а не Македонци. Ова е фашизам, изјави Радев за бугарските новинари.