Социјалниот дијалог продолжува, блиску сме до конечни решенија, изјави пред малку министерката за труд и социјална политика Јована Тренчевска, по средбата со синдикалниот лидер Јаким Неделков. „Дојдовме до приближување на ставовите. Денес разговаравме за повеќе понудени решенија од Министерството и од СОНК и ни треба дополнително време да ги усогласиме. Во текот на следните денови ќе продолжиме со дијалогот и до крајот на неделава се надевам ќе имаме конечен договор. Ни треба дополнително време да ги усогласиме предлозите на двете страни, но до четврток или петок ќе го имаме конечното решение“, рече министерката.
Синдикалниот лидер Јаким Неделков рече дека преговорите се движат во позитивен правец. „Убедени сме дека и овој проблем ќе биде решен до крајот на неделава, има добра волја од двете страни“, изјави Неделков.
Тој рече дека „привршуваат и преговорите со Министерството за образование и наука“. Следната рунда преговори ќе се одржи попладнево во 16.30 часот.
„Привршуваат и преговорите со Министерството за образование и наука, кои се одвиваат со помирувач. Тоа што беше договорено за платите во образованието ќе важи и за во детската заштита. Колективните договори ќе бидат изготвени во соодветна рамка, односно во термин за кој сме веќе блиску до утврдување. Рокот за преговори со Министерството за образование и наука завршува утре. Денеска имаме средба со нив каде што ќе ги договориме сите работи“, рече Неделков. (С.К.)