Претседателот на Украина, Володимир Зеленски, призна дека силите на Киев во моментов трпат до 100 жртви и 500 ранети секој ден.
Во интервју за американскиот телевизиски канал Newsmax што се емитуваше вчера, Зеленски рече:„Ситуацијата е многу тешка. Губиме 60-100 војници дневно кои се убиени во акција и околу 500 луѓе ранети во акција. Најтешка е ситуацијата на истокот на Украина и јужниот дел на Доњецк и Луганск“, додаде Зеленски.
Украина и нејзиниот народ се „одбранбен периметар“ за светот против агресијата на Владимир Путин, изјави тој за каналот.
„Мораме да сфатиме која е мрачната сила: тоа е Русија. И Русија сигурно нема да застане во Украина. Останатите земји, поранешните републики на СССР и членките на ЕУ – некои од нив веќе се земји членки на НАТО – тие веќе се под закана“, изјави украинскиот претседател.
„Путин не може да победи, а светот мора да престане да го брани за најновите ѕверства извршени од руските трупи“, продолжи тој, истовремено жалејќи што ЕУ не може да постигне консензус за целосно спроведување санкциите.