Северна Македонија и САД денес во Вашингтон ќе одржат стратешки дијалог чиј формален домаќин ќе биде помошничката државен секретар за европски и евроазиски прашања, Карен Донфрид. Македонската делегација ја предводи министерот за надворешни работи Бујар Османи, а во делегацијата се и министерката за одбрана Славјанка Петровска, министерот за економија Крешник Бектеши и за кулутура Бисера Костадиновска Стојчевска.
Стратешкиот дијалог, како што рекоа од Владата при составувањето на делегацијата, претставува подигнување на односите со САД на повисоко ниво. При разговорите ќе бидат опфатени теми од билатералните односи за соработка во економијата, трговијата, образованието, транспортот, енергетиката, климатските промени, демократскиот развој, борбата против корупција, владеењето на правото, како и безбедносните сегменти од соработката, миграција, борба против тероризам и справување со организираниот и меѓународен криминал.
Дијалогот ги опфаќа и актуелните безбедносни состојби, соработката на двете земји како НАТО партнери, аспирациите на Северна Македонија за зачленување на ЕУ и претстојното претседавање на земјава со ОБСЕ.
Македонската делегација е придружувана во САД и од амбасадорката Кејт Мари Брнз. Во пресрет на денешната рунда разговори, Брнз во интервју за Алсат-М рече дека од американска страна ќе присуствуваат и претставници од одбраната и од други федерални владини агенции.
„Идејата е да се разгледаат можностите за интензивирање на соработката. Очекуваме дека ќе има заеднички изјави по завршувањето на состанокот, и тоа ќе ни помогне да ги идентификуваме областите од обостран стратешки интерес“, рече Брнз.
„Стратешкиот дијалог е комплементарен со визијата на Северна Македонија да стане полноправна членка на Европската Унија, целосно интегрирана во сите евроатлантски институции”, истакна таа во интервјуто како одговор на прашањето дали чекорот на САД е предизвикан од застојот во евроинтеграциите на Македонија и дали на него треба да се гледа како на замена за неуспехот да се почнат преговорите со ЕУ.
„Дозволете ми прво да појаснам дека стратешкиот дијалог не е за барања туку за разбирање и да видиме што можеме да направиме заедно. Граѓаните бараат демократија која создава можности, просперитет и создавање подобра иднина за следните генерации. Иднината на Северна Македонија и на Западен Балкан е во Европа”, подвлече амбасадорката.
„Целта на стратешкиот дијалог е да ги лоцираме областите во кои немаме целосна дипломатска соработка. Ние имаме веќе соработка во одбраната, но можеме многу повеќе да направиме во други области како што се економијата, енергијата, добро владеење, младите,културна и образовна размена”, рече таа.
Пред почетокот на стратешкиот дијалог министерската четворка во Вашингтон одржа средби со претседателот на ИРИ (National Republican Institute), Даниел Твининг и со претседателот на Националниот демократски институт (NDI), Дерек Мичел.
(С.К.)