Пораки пратени на една личност не смеат да се даваат на увид и да се препраќаат на други лица, а особено ако се од интимна содржина, вели за НоваТВ, адвокатката Катерина Котеска која го доби спорот за битолската „Јавна соба“.
Нејзината клиентка била изложена на срам со јавно објавување на интимни фотографии, а чинот наместо да се осуди, бил предмет на јавен потсмев.
„Бидејќи во нашата држава живееме претежно во мали средини, за жал, пристапот кон оваа проблематика е малограѓански, па наместо да ѝ се даде помош и поддршка на жртвата, таа е осудена. Кога на една личност ќе ѝ биде злоупотребена довербата со објавување на лични пораки или слики со интимна содржина, нејзиниот живот се претвора во пекол“, вели Котеска.
Сите блиски, сакајќи да се заштитат себеси од срамот и осудата на средината, се повлекуваат и ја оставаат жртвата сама, а во ваква ситуација, додава Котеска жртвата е исплашена, засрамена и оставена самата на себе.
„Како адвокат, а најмногу како човек, сметам дека злоупотребата на довербата треба да е на прво место и да е најважна и истата да се казни, а не да се осудува жртвата и нејзиното однесување. Жртвата ги загуби пријателите, работата, а беше и отфрлена од средината. Од искуството со тој предмет, можам да кажам дека институциите сè уште немаат искуство и пракса за справување со оваа проблематика, што жртвата ја става на т.н. секундарна виктимизација, односно обраќајќи се за помош да наиде на потсмев и осуда“, дополнува адвокатката Котеска.
Кога се случило објавувањето на спорните фотографии, Котеска не се двоумела ниту секунда да го преземе случајот.
„За среќа, жената која ја застапував ме имаше мене цел процес, да одам по институции и да го неутрализирам обидот за потсмев и осуда, па на крајот да добиеме пресуда со која сторителот ќе биде казнет. Најважно е жртвата и сите потенцијални жртви да се заштитат од оваа појава. Секој, кој ќе сака да направи такво нешто да знае дека ќе биде и да биде казнет. Казната секогаш се определува согласно начинот на извршување на делото и личноста на сторителот“, додава таа.
На прашањето дали висината на отштетата во овие предмети може да ја залечи емоционалната рана на жртвата, таа вели дека не е тоа толку важно, најважно е овие лица да бидат заштитени.
Досега четиригодишна казна затвор добија обвинетите Дарко Костовски, основач и администратор на „Јавна соба“ и Михаил Пановски, администратор и модератор на групата. Судот им пресуди за кривичното дело „Производство и дистрибуција на детска порнографија“.
Маја Терзиова