„На конгресот на европските народни партии беше донесена резолуција во која што се вградени барањата во однос на негирање на националниот и историскиот континуитет на Македонците и на таа резолуција присуствуваше делегација на највисоко ниво од ВМРО-ДПМНЕ. Никаде не видовме прес-конференција на спротивставување, тоа ќе остане запаметено“, и порача на опозицијата шефот на Владата Ковачевски на денешната седница за пратенички прашања.
Тој рече и дека е „лесно некој да брани национални интереси тука, дома, но, кога треба да се бранат национални интереси пред 27 земји, тогаш на некого тоа му е тешко, а некој тоа мора да го направи како што јас, претседателот на државата, коалициските партнери и граѓаните на државата тоа го направивме, без разлика на својата припадност – се борат за својот национален, етнички верски идентитет и континуитет. На еден секогаш му припаѓа честа тоа да го брани и пред други, овојпат тоа на мене ми припадна како чест и сум горд што сите заедно застанавме и го кажавме тоа што требаше да го кажеме, не навредувајќи никого ниту дома ниту надвор“, рече Ковачевски, на седницата за пратенички прашања во Собранието.
Во однос на прашањето дали е подготвен да се согласи на предвремени избори Ковачевски одговори дека е поважно да се одбранат интересите на државата алудирајќи на последниот развој на настаните околу бугарското вето и неуспехот Македонија да ги почне преговорите за членство во ЕУ.
„Предвремени парламентарни избори не треба да има. Ние во моментов имаме Влада којашто се грижи за националните интереси и за достоинството на сите граѓани, без разлика на тоа од која етничка, верска и национална припадност доаѓаат. Тоа се случи и во изминатиот период, кога националните интереси на Република Северна Македонија, согласно одлуките и резолуциите донесени тука во Собранието, беа застапувани од страна на сите членови на Владата, без разлика на тоа дали се Македонци, Албанци Турци, или од која било друга национална припадност. И тоа се потврди мината недела кога на принципиелен начин ние ги искажавме нашите ставови пред сите наши партнери во ЕУ и пошироко“, посочи Ковачевски. (С.К.)