Вечерва премиерот Димитар Ковачевски одржа вонредна прес-конференција на која информираше за одлуките на Економско- енергетскиот совет кој имаше седница. Тој ја отвори прес-конференцијата со оценка дека Владата обезбедила стабилно снабдување со енергенси за наредниот период. Ќе има и парно греење за граѓаните на Скопје.
„Донесена е одлука за почнување на постапката за издавање на лиценца за производство на топлинска енергија од регулиран пазар согласно член 6 од законот за енергетика на ЕСМ. Ги повикувам Град Скопје, Регулаторна комисија за енергетика и Комисијата за заштита на конкурентност во најбрзо време да дадат позитивно мислење, со што ќе се створат условите за целосно функционирање на ЕСМ со топланите“, рече Ковачевски и дополни дека се обезбедени финансиски средства за потребните енергенси за
топлинска енергија.
Во однос на електрична енергија премиерот информираше дека домаќинствата и малите потрошувачи ќе добијат сигурна, стабилна и континуирана испорака на електрична енергија. „80 отсто ја субвенционираме сметката за електрична енергија за 650 илјади домаќинства, а над 70 илјади компании и други правни субјекти кои се со до 2 милиони евра годишен промет ќе добијат субвенционирана електрична енергија која е три пати пониска од берзанската“, посочи тој.
Шефот на Владата извести и дека донеле одлука на регулиран пазар да бидат и основните и средни училишта на територијата на цела држава, без разлика што обврската за обезбедување на образовниот процес е на самите општини.
Исто така донесовме одлука, рече Ковачевски, со која сите јавни здравствени установи ќе бидат обезбедени со електрична енергија преку ЕСМ продажба по поволна цена од берзанската. Затоа што грижата за граѓаните и обезбедување на здравствена заштита е императив на оваа влада, вели премиерот.
„Владата се грижи за сите подеднакво. Оваа криза рековме дека заеднички ќе ја пребродиме како што ја пребродивме и ковид кризата. Апелирам до сите граѓани да продолжиме со мерките за штедење. Секој заштеден киловат час значи заштеда на нашиот буџет и повеќе пари за инвестиција во нови енергетски и инфраструктурни проекти кои ќе го подобрат во иднина снабдувањето со електрична енергија и ќе го подобрат квалитетот на животот“, рече Ковачевски.
„Заврши времето на изобилие со електрична енергија во Европа. Сега е време на штедење и тоа штедиме за да имаме електрична енергија“, истакна тој.
Ковачевски, во пресрет на утрешната собраниска седница ги повика пратениците од сите политичките партии да ги изгласаат Законот со кој се обезбедуваат финансиски средства од ЕБРД за справување со енергетска криза по исклучителна каматна стапка, измените во Законот за енергетика и Законот за нафта и нафтени деривати и усвојување на кризна состојба.
„Ова не време за политички поени, туку е време за разум, солидарност и социјална грижа“, изјави тој.
Вечерашниве, како што посочи премиерот, се само прв сет на одлуки на Економско – енергетскиот совет и најави дополнителни мерки за ранливите граѓани, кои што наскоро ќе бидат објавени. (С.К.)
