Претседателот на собраниската Комисија за надворешни работи, Антонио Милошоски од ВМРО-ДПМНЕ, итно да закаже седница на комисијата со цел да започне процедурата за ратификација на договорите од иницијативата „Отворен Балкан“, повика денес Дарко Каевски, портпаролот и пратеник од СДСМ.
Со овие договори, рече тој, граѓаните на Северна Македонија, Србија и Албанија ќе добијат можност да работат во која било од трите држави без да вадат работни дозволи.
„На овој начин ќе се отворат нови работни места, пополнувања на дефицитарните работни места во приватниот сектор во сите три држави кои се дел од Иницијативата. Завршени се сите подготовки за либерализирање на пазарот на трудот и изнајдени се решенија за да започне издавањето на Идентификацискиот број за граѓаните на Отворен Балкан, кој е неопходен технички предуслов за слободно движење на пазарот на трудот во сите три држави“, посочи Каевски.
Тој подвлече дека македонските граѓани се уште не можат да ги почувствуваат придобивките од ова, затоа што меѓународните договори со кои се уредува оваа материја се уште не се ратификувани, а услов за тоа е да поминат прво на Комисијата за надворешна политика со која претседава Антонио Милошоски .
„Истовремено, не се ратификувани уште неколку договори поврзани со Иницијативата ‘Отворен Балкан’. А не се ратификувани затоа што Милошоски упорно не ја закажува седницата и на тој начин дејствува на штета на граѓаните, на штета на државата. Сите пратеници, имаме обврска да им служиме на граѓаните, меѓу нив е и Милошоски и затоа, уште еднаш го повикуваме да ја закаже седницата на Комисијата, конкретните договори да бидат изгласани, за граѓаните што поскоро ги почувствуваат придобивките од нив“, рече Каевски.