Додека спасувачите продолжуваат да се борат со лошото време за да бараат преживеани, бројот на загинатите од силниот земјотрес се приближува до 11.000. Но, постојат предупредувања дека бројот може да продолжи да расте.
Во еден од најтешко погодените турски градови, роднините на затрупаните под урнатините се вклучија во потрагата користејќи стапови и други рачни помагала. Додека операциите за пребарување продолжуваат во услови на опаѓање на температурите, шансите за пронаоѓање на преживеани изгледаат слаби.
Два земјотреси, со јачина од 7,8 и 7,5 степени според Рихтеровата скала, се случија во понеделникот во раните утрински часови во близина на Газиантеп, Турција, а потреси ја зафатија и соседна Сирија. Според ОН, земјотресот доведе до уште поголем хаос во Сирија. На луѓето на 70 отсто од територијата на земјата и без земјотресот им беше потребна хуманитарна помош.
По разорниот земјотрес, телефонските компании понудија бесплатни повици и пораки во Турција и Сирија за да можат семејствата да останат во контакт и спасувачките операции да продолжат непречено. Разговорите и пораките ќе бидат бесплатни до 15 февруари.
Според УНИЦЕФ, болниците во Сирија се преполни со луѓе кои страдаат од трауми, скршеници и раскинати мускули и лигаменти. Повеќе од 7.500 турски војници работат во подрачјата погодени од земјотресот и помагаат во пребарувањето, пренесува АФП.
Според податоците на Светската здравствена организација, од земјотресот претрпеле штети близу 23 милиони луѓе во Турција и Сирија.