Министерот за надворешни работи Бујар Османи, во рамки на претседавањето на Северна Македонија до ОБСЕ во 2023, назначи двајца нови специјални претставници на претседавачот: за невладини организации, Андреа Стојковски и за млади, Мемет Жаку.
Османи, како што велат од неговиот прес офис, „водејќи сметка за важноста на невладиниот сектор, како и иднината и позицијата на младите во земјата и во ОБСЕ регионот, во листата на свои специјални претставници ги додаде и овие две позиции, покрај претходно назначените вообичаени специјални претставници на претседавачот на ОБСЕ, кои ќе му помагаат во неговата работа со цел да се обезбеди подобра координација на напорите на земјите-учеснички за промоција на улогата на овие области“.
„Стојковски и Жаку, во рамките на нивните мандати и во тесна координација со Османи, ќе дадат поддршка за реализирање на активностите кои нам ни се битни, како и ќе допринесат за зајакнување на позицијата на невладиниот сектор и на младите во сите аспекти на ОБСЕ, преку промоција на политичката димензија на нивните портфолија и соодветно застапување на интересните групи, организирање на низа форуми, конференции и други слични настани“, соопшти Министерството за надворешни работи.
„Задоволство ми е да ги претставам Стојковски и Жаку, како мои специјални претставници во рамки на претседавањето со ОБСЕ, за кои сум уверен дека достоинствено ќе се носат со позицијата. Перспективите и придонесите на граѓанското општество и на младите се значајни во работата на сите три димензии“, рече Османи.
Шефот на дипломатијата досега има назначено голем број лични и специјални претставници при вршењето на улогата претседавач на ОБСЕ. Меѓу имињата се Хенрик Виладсен, проектен координатор во Украина, Андреј Каспжик, за конфликтот кој се решава во рамки на Минската конференција на OБСЕ, Томас Мајер-Хартинг, за процесот на разрешување на разликите поврзани со Транснистрија, Виорел Мошану, за Јужен Кафказ, Лилиана Палиховичи, за родова еднаквост; Анита Рамасастри, за борба против корупција, Валиjант Ричи, за борба против трговија со луѓе, Исмаил Хаки Муса, за борба против нетолеранција и дискриминација спрема Муслиманите, и други. Од Македонија за претставник е назначен и полковник Горан Василевски, поранешен шеф на разузнувањето на Армијата и сегашен раководител на Групата на високо ниво на ОБСЕ за планирање.