Пишува: Ана Василевска
Со поништувањето на мандатот на в.д директорот на Младинскиот културен центар Никола Алексов, со пресудата на Управен суд практично се поништуваат сите одлуки и решенија кои ги донел од моментот на неговото назначување. Тоа значи дека од 14 јануари до сега, МКЦ нема директор, реагираат од програмскиот колегиум на МКЦ.
„Жалиме што се занемаруваат законските процедури, на кои од почетокот како колегиум се повикуваме. Докажавме дека сме во право. Сакаме отворен и транспарентен јавен конкурс за директор на институцијата согласно пропишаните законски услови за сите професионалци од културата. Градот постојано се крие и тврди дека законски се работи кога тие, најфлагрантно го кршат законот по утврдена судска пресуда. Конечно нека се одважат и надлежните институции: Министерството за култура, Трудовиот инспекторат, Антикорупциска и најважно: советниците од сите пратенички групи од Советот на Градот за случувањата , за кои се известени и по писмен пат. Некој мора да даде одговор и решение.“, велат за НоваТВ членовите на колегиумот кои првдата ја побараа и ја добија во судската постапка против легитимноста на изборот на директорот Алексов.
Инаку, како што вчера објави НоваТВ Никола Алексов, детектив по професија беше именуван за вршител на должноста директор на Младинскиот културен центар на 17 јануари а неговото нерегуларно поставување го утврди Управниот суд со пресудата на 28 април.
Но оваа законска одлука не е земена во предвид , и Алексов е повторно именуван на 20 мај со решение од градоначалничката на Данела Арсовска.
Извори на НоваТВ велат дека членовите на Управниот одбор на МКЦ имајќи ја во предвид пресудата, укажале и се противеле на одлуката за реименување на Алексов, но решението било потпишано од Арсовска и истото се држи во тајност.
Како што стои во пресудата на Управниот суд „решението за именување вршител на должност број 08-616/ 1 на 17.01. 2023 година на Градоначалникот на Град Скопје, СЕ ПОНИШТУВА“
Понатаму во образложението на судот јасно е потенцирана незаконитоста на постапката за избор на Алексов.
„Оценувајќи ја законитоста на оспореното Решение, Судот најде дека истото е незаконито поради правилата на постапката, односно од причина што истото содржи такви суштествени недостатоци, што ја спречуваат оценката на законитоста на истото.“, пишува во образложението на пресудата.
Прашината која се крена околу самоволието на Арсовска и назначувањето на несоодветен кадар на местото на директор на МКЦ, почна од денот на неговото назначување. Тогаш, Арсовска обвини за наводни нерегуларности во работата на институцијата.
По овие обвинувања, програмските уредници на Младинскиот културен центар, излегоа на прес конференција, и побараа да престане мобингот и заканите кон вработените, и доколку има нерегуларности тие да се докажуваат по законски и правен пат. Тие беа децидни дека поставувањето на директорот кој е професионален детектив, е политизација и партизација на институцијата и бараат да се отвори фер и регуларен конкурс за избор на квалификуван директор на МКЦ.
Градоначалничката Арсовска и надлежните институции останаа глуви и на масовните мирни протести пред МКЦ организирани по повод незаконскиот избот на Алексов.
И на најгласното спротиставување кон поставување на несоодветен кадар на директорското место, Арсовска се бранеше дека компетенции на директорот, споредбата со други работници во културата што немаат соодветното образование, дури и програмските уредници немаат соодветно образование, зошто директорот да биде дискриминиран – законот не вели дека треба да има соодветно образование.