Еден од четворица мажи во Велика Британија на возраст од 16 до 29 години смета дека е покомплицирано да се биде маж отколку жена, а еден од петмина има позитивно мислење за медиумскиот влијател Ендру Тејт, покажува анкетата со над 3.600 испитаници.
Ендру Тејт, поранешен американско-британски кикбоксер со 8.7 милиони следбеници на социјалната мрежа X, се соочува со обвиненија во Романија за трговија со луѓе, силување и формирање криминална група. Ендру Тејт отворено зборувал за гушење и удирање жени и себеси отворено се изјаснува како мизогонист.
На прашањето за феминизам, 16% од машката популација на генерацијата Z сметаат дека сторил повеќе штета отколку добро. Меѓу лицата над 60 години само 13% го сметаат истото.
Овие податоци произлегуваат од анкетата ИПСОС на политичкиот институт на колеџот Кингс Колеџ во Лондон.
Директорот на политичкиот институт, Боби Дафи, изјави дека ова се нови и необични генерации. „Обично младите генерации се поудобни со новите општествени норми, бидејќи растеле со нив“, додаде тој.
Според анкетата неспорно е дека поголем дел од мажите сметаат дека феминизмот донел повеќе добро отколку зло и имаат негативно мислење за Ендру Тејт, но Дафи нагласи дека секогаш, и во новите генерации, е присутна група на мажи кои го мислат спротивното.
Професорката Рози Кембел рече дека овие резултати биле многу веројатни поради фактот што голем дел од информациите за феминизмот мажите ги добиваат од социјалните мрежи.
Многумина предупредуваат за негативното влијание на Ендру Тејт и можноста да го загрози машкиот идентитет и родовите улоги.
Тејт кој претходно велеше дека е атеист, сега тврди дека ја прифатил исламската религија. Тејт смета дека бојата на кожата влијае врз физичката сила и интелигенцијата на луѓето.
Ендру Тејт е привлечен за машката популација поради неговите објаснувања за машкоста, за храброста и неговите токсични ставови за женското однесување и феминизмот. Тој е голем противник на ЛГБТ движењата, феминистките, а се залага за ‘традиционални’ вредности. Дел од ставовите на Ендру Тејт се дека мажите треба да бидат богати, да ги доминираат жените, да бидат опкружени со повеќе жени, да вежбаат и да бидат силни.
Прашањето е дали оние 8.7 милиони следбеници ги поддржуваат неговите токсични ставови.
Извор: Гардијан
Подготви: Марија Тодоровска