Објектот немал хидрантска мрежа ни хидрант во употребна функција. Немало доволно противпожарни апарати според квадратурата на објектот односно само 2 имало. Немало две излезни врати пропишани за евакуација, …
Мирослава Симоновска
Јавното обвинителство денеска почнало да истражува што доведе до пожарот во дискотеката „Пулс“ во Кочани и како објектот со години добивал дозволи, собирал малолетници секој викенд на очиглед на полицијата со големи јавни повици и посетеност, а за тоа никој не нашол за сходно да изрече казни и затворање на објектот. Обвинителот Љупчо Коцевски рече дека обвинителството денеска издало наредби да се прегледаат камери, да се апси секое лице кое со неговото постапување или постапување придонело за настанот и да се испита неговата улога, како и наредба за форензички да се испитаат предмети. За 10 лица Обвинителството од судот ќе бара притвор (краткотраен). До основниот суд Кочани, обвинителството поднело предлог да се одземе цела документација за дискотеката „Пулс“. Од кочанскиот суд побарано било да се изврши и претрес во дом. Денеска дел од јавните обвинители извршиле и увид на лице место во дискотеката и тој траел до вечерва, а ќе продолжи утре сабајле.
Објектот немал хидрантска мрежа ни хидрант во употребна функција. Немало доволно противпожарни апарати според квадратурата на објектот односно само 2 имало. Немало две излезни врати пропишани за евакуација за луѓе, туку една метална врата, импровизирана на задниот дел од објектот, но била заклучена со катанец и без квака од внатре и обложена со гипс картон и сунѓер за звучна изолација. Немало пристап за противпожарни возила од двете страни согласно правилникот за заштита од пожари експлозии и опасни материи. Внатрешноста на објектот била обложена со гипс картон, но не со огноотпорни својства. Немало спуштен таван со противпожарна отпорност од најмалку 30 минути. Немало врати со противпожарна отпорност со најмалку 1 час, ни систем кој би ги предупредил посетителите дека настанал пожар со јак звучен сигнал. Дискотеката била непрописно обложена со материјали за звучна изолација и лесно согорливи материјали, Во објектот противзаконски биле користени пиротехнички материјали на висина од 3 метри без дозвола. На лице место бил присутен и државен инспекторат за градежништво и урбанизам со тоа што констатирано е дека објектот во кој е случена несреќата е регистриран како објект за лесна индустрија со површина од 419 квадрати. Не е извршена пренамена на објектот од лесна индустрија во угостителски објект. И покрај тоа што немало пренамена, истиот добил дозвола за работа од Министерството за економија како за угостителски објект издадена пред 15 години, рече Коцевски.
Тимот на јавното обвинителство уште нема донесено наредба за истражна постапка. Станува збор за кривично правен настан за кој се потребни повеќе дејствија за лоцирање одговорност за повеќе сторители сторители на повеќе кривични дела „тешки дела против општата сигурност“ и постоење основано сомнение за други кривични дела – ќе се даде предлог за краткотраен притвор.
Јавното обвинителство сослуша еден од првите осомничени. Тоа е еден од организаторите. Од неговиот исказ има релевантни докази дека нема писмен договор меѓу организаторот и групата за организирање на концертот. Може евентуално да се работи за кривични дела од член 292, од член 357 (давање и примање поткуп) и во врска со пиротехничките средства. Лицата постапувале спротивно од прописите за заштита и предизвикале штета од големи размери. Местото е обезбедено, утре сабајле ќе продолжи увидот и ќе ангажираме јавни обвинители од основното јавно обвинителство Скопје, додаде Коцевски.
Тој потврди дека Крешник Бектеши поранешен министер за економија е во полициска станица на распит. Десет лица се осомничени но не може да се каже кои се. Над 20 лица се викнати на информативен разговор. Линк