Дописникот на Ал Џезира од Газа јави дека најмалку 71 Палестинец, меѓу кои и жени и деца, се убиени во нападите на Израел пред зори на северот и југот на територијата.
Израел вчера најави дека ќе ги интензивира воените операции како „конечно предупредување“ за жителите на палестинските територии доколку Хамас не ги ослободи израелските заложници.
Службата за цивилна заштита во Појасот Газа соопшти дека најмалку 436 луѓе се убиени во обновените израелските напади, што почнаа во понеделникот вечерта.
Израел продолжи со бомбардирањето, прекршувајќи го прекинот на огнот што почна на 19 јануари, а презеде и серија копнени операции во централниот и јужниот дел од енклавата за да се создаде тампон-зона помеѓу северот и југот на палестинската територија разурната од војна.
Според најновиот извештај на палестинското Министерство за здравство од почетокот на војната во Појасот Газа загинале 49.547 луѓе, од кои поголемиот број деца и жени.