Србија бележи позитивни резултати во макроекономската стабилност и фискалната дисциплина, но нема напредок во владеењето на правото и слободата на медиумите, а загриженост предизвикуваат и блиските односи со Русија, се оценува во Извештајот на Европскиот парламент за Србија.
Српските власти треба да покажат силна политичка волја и доследност во спроведувањето на реформите поврзани со ЕУ и недвосмислено да комуницираат со граѓаните за Унијата и за европскиот пат на Србија, се наведува во Извештајот.
Во документот се посочува дека Србија е на „добро ниво“ на подготовка во однос на макроекономската стабилност и фискалната дисциплина, но дека има „ограничен“ или „никаков“ севкупен напредок во исполнувањето на критериумите за членство во ЕУ во клучните области како што се владеењето на правото, слободата на медиумите, реформите во јавната администрација и усогласувањето со политиките на Унијата, особено во делот на надворешната политика.
Според известувачот на ЕП за Србија, хрватскиот европратеник Тонино Пицула, долгата политичка криза, интензивирана поради недостигот на напредок во основните критериуми, како што се корупцијата, владеењето на правото, слободата на медиумите и изборните реформи, има директно влијание врз напредокот на државата кон членство во ЕУ.
Тој процес е заснован на заслуги, а напредокот на Србија може да има позитивно влијание врз целиот регион, додаде Пицула.
Косово постигна напредок во изборните реформи, економската отпорност и заштитата на основните права, но заедно со Србија мора да избегнува еднострани активности кои го поткопуваат процесот на дијалог Белград-Приштина, се наведува во Извештајот на Европскиот парламент за напредокот на Косово во 2023 и 2024.
Во документот се повикува и на „итно укинување“ на рестриктивните мерки на ЕУ против Косово, кои, според европратениците, повеќе не се оправдани, бидејќи Приштина ги исполнила барањата на ЕУ. Во текстот се потенцира дека овие мерки се „во голема контрадикторност со посветеноста на Косово на европските вредности“ и го попречуваат продолжувањето на дијалогот Белград-Приштина.
Европратениците оценуваат дека овој дијалог досега не ги даде очекуваните резултати и ги повикуваат Косово и Србија да ги спроведат договорите од Брисел и од Охрид и да се формира на Заедницата на општини со мнозинско српско население, а од Белград се бара да престане со противењето на членството на Приштина во регионални и меѓународни организации.
Во Извештајот, исто така, се повикуваат Белград и Приштина да избегнуваат еднострани активности кои би можеле да го поткопаат процесот на нивниот дијалог.
Известувачот на ЕП за Косово, естонскиот европратеник Рихо Терас оцени дека на процесот на интеграција на Косово му треба нов моментум и дека е потребно ново поглавје во разговорите меѓу Приштина и Белград.
Исклучително позитивно е тоа што сите големи партии на политичкиот пејзаж на Косово се силно за интеграција во ЕУ. Иднината на Косово е во европското семејство, заснована на Реформската агенда и ние мора да работиме заедно, Терас.