Други борци мислат спротивното. Матрос, кој се бори од 2018 година, смета дека предавањето на Донбас „би поништило сè сите жртви, целиот напор, сите загинати војници и цивили“.
Украинските војници на фронтот реагираа на нацрт-предлогот за мир на САД со мешавина од пркос, гнев и резигнација, според одговорите испратени до Би-би-си преку социјалните медиуми и е-пошта откако деталите за првичниот план беа објавени минатата недела.
Оттогаш, американските и украинските преговарачи работат на амандмани, додека разговорите за „рамка за мир“ продолжуваат. Но, раните реакции од фронтот откриваат длабока недоверба кон американскиот документ.
„Ужас … никој нема да го поддржи“
Јарослав, војник од источниот фронт, вели дека планот е „ужасно лош… никој нема да го поддржи“, додека воениот лекар со кодно име Штуцер го нарекува нацртот „апсолутно срамен и недостоен за нашето внимание“.
Друг војник, познат под псевдонимот Снејк, искрено признава дека му се чини дека „дојде време барем за некаков договор“. Како што пренесува британскиот медиум војниците коментираа за некои од клучните точки од оригиналниот американски мировен план. Од друга страна САД го презентираа својот нацрт во момент кога Русија бележи значителен напредок на бојното поле, при што Украина изгуби дополнителни 450 км² само во изминатиот месец, наведува медиумот.
Нека го земат Донбас, нема повеќе луѓе
Украина и понатаму контролира околу 15% од Донбас, клучен стратешки регион кој со години е во фокусот на руските амбиции. Но, американскиот нацрт предвидува предавање на целиот регион, вклучувајќи ги териториите што украинските сили ги бранеа речиси четири години.
„Нека го земат“, вели Снејк. „Речиси никој не остана во градовите и селата… Не се бориме за луѓе, туку за земјата, додека губиме уште повеќе луѓе.“
Андриј, офицер на Генералштабот, признава дека предавањето на Луганската и Донецката област е „болно и тешко“, но верува дека Украина можеби нема избор.
„Можеби не сакаме да се откажеме, но нема да можеме да го одржиме со воена моќ и ресурси.“
Други борци мислат спротивното. Матрос, кој се бори од 2018 година, смета дека предавањето на Донбас „би поништило сè сите жртви, целиот напор, сите загинати војници и цивили“.
Намалување на украинските вооружени сили
Оригиналниот американски нацрт-договор бара Украина да ги намали вооружените сили на 600.000 војници, значително помалку од сегашните повеќе од 800.000, но сепак повеќе отколку пред руската инвазија во 2022 година.
Снејк верува дека земјата ќе има потреба од голем број војници за обнова по војната.
„Која е поентата да имаме толку многу војници ако ќе има безбедносни гаранции?, прашува украинскиот војник.
Андриј се согласува: „Ако има цврсти гаранции, нема потреба од толку многу војници. Луѓето се уморни и сакаат да се вратат кај своите семејства.“
Штуцер, од друга страна, вели дека армијата е „единственото нешто што нè одделува од пораз и поробување“, додека Матрос го нарекува предлогот „апсурден и манипулативен“.
Безбедносни гаранции
Клучното прашање за сите војници е: како Украина ќе се одбрани по потпишување на договорот?
Нацртот го исклучува членството во НАТО, но не и влезот во ЕУ. Предвидува американски безбедносни гаранции, но без јасни механизми. Исто така, забранува присуство на НАТО трупи во Украина.
Евген, оператор на беспилотни летала, верува дека единствена вистинска гаранција е распоредување сојузнички трупи.
„Ми се допаѓа планот на Велика Британија да испрати трупи во Украина. Тоа е единствениот начин да се победи – вели тој.
Но, Андриј не ѝ верува на Европа.
„Европа се покажа како кукавичка и поделена. Сета надеж останува кај САД – додава војникот.
Сепак, нацртот на САД предлага одржување на нови избори во Украина во рок од 100 дена по завршување на војната. Изборите во земјата моментално се забранети поради воена состојба, но незадоволството од властите расте по серијата корупциски скандали.