Дополнителниот заменик министер за финансии Кире Наумов денеска изјави дека дополнителниот заменик министер за внатрешни работи Митко Чавков се обидел да ги изманипулира вработените во МВР и јавноста за наводна одлука на Владата од 29.03.2016 година за зголемување на платите во Министерството за внатрешни работи.
Според Наумов, Чавков тоа го направил повикувајќи се на договор помеѓу Министерството за внатрешни работи и Македонскиот полициски синдикат од 2015 година.
– Во Буџетот на РМ за 2016 година не се предвидени средства за реализирање на гореспоменатиот договор. Митко Чавков во 2015 година како министер за внатрешни работи не успеал да обезбеди средства за зголемување на ставката исплата на плати и надоместоци, ниту Владата предводена од Груевски во Предлог буџетот за 2016 година побарала од Собранието на РМ да се обезбедат средства за исплата на зголемени плати на вработените во Министерството за внатрешни работи, се наведува во соопштението од Наумов.
Според него, потврда за ова е Информацијата за недостиг на средства согласно објавениот буџет за 2016 година во однос на реално потребните средства за нормално функционирање на МВР за 2016 година. Дописот од МВР под бр.13.1.2-11974/1 е доставен до Владата на РМ на 24.02.2016 година.
Информацијата од МВР, тврди Наумов, била разгледана на седница на Комисијата за економски систем и тековна економска политика на Владата одржана на 01.04.2016 година.
– Во врска со информацијата на МВР од 24.02.2016 година, Министерството за финансии доставило мислење до Комисијата за економски систем и тековна економска политика на Владата на РМ во кое Министерот Ставрески потврдува дека во буџетот не се предвидени средства за покачување на платите за вработените во МВР. Вчерашното соопштение на дополнителниот заменик министер Митко Чавков претставува јалов обид да ја дефокусира јавноста и да ја тргне одговорноста од себе за непочитување на договорите што самиот ги потпишал, вели Наумов.
Дополнителниот заменик министер Чавков вчера објави соопштение според кое платите на вработените во МВР од мај се зголемуваат и дека покачувањето е договорено во март лани, меѓу МВР и Полицискиот синдикат. Во соопштението се наведува согласно тој договор, овој процес треба да заврши во 2017 година.