Фудбалската репрезентација на Албанија во 15 часот ќе игра историски натпревар, својот прв меч на Европско првенство. Противник на Албанците е Швајцарија.
На Албанија ова е дебитантски настап на ЕУРО, а Швајцарците после 20 години и првеството во Англија, повторно се изборија за настап меѓу најдобрите репрезентации во Европа.
„Не дојдовме овде само да учествуваме, сакаме да ја поминеме групата и да останеме што подолго во натпреварувањето.“, порача селекторот на Албанија Џани Де Биаси, иако неговите момци според обложувалниците се оценуваат како најслаб тим на првенството.
Инаку, овој меч меѓу Албанија и Швајцарија е посебен, затоа што за прв пат двајца браќа ќе играат на две спротивставени страни.
Таулант Џака ја одбра Албанија за која дебитираше во 2014 година, а Гранит е репрезентативец на Швајцарија уште од 2011 година.
Нивните родители Рагип и Елмазе од Косово, во 1989 година емигрирале во Швајцарија, а Таулант и Гранит се родени во Базел. Двајцата играа за Швајцарија во млади категории, но постариот брат Таулант (25), во 2013 година одлучи да настапува за Албанија.