Додека градоначалникот на Битола Владимир Талески го минува првиот ден во домашен притвор, членови на ВМРО-ДПМНЕ му даваат морална поддршка со собир пред општинскиот комитет на партијата.
Од ВМРО ДПМНЕ ги обвинија судиите кои му одредија домашен притвор на Талевски дека потклекнале на притисоците на СДСМ и Зоран Заев.
– Владимир Талески е жртва на класичен политички прогон кој треба да ги смири фрустрациите од неуспешното делување на аболицираниот криминалец Зоран Заев против сопствениот народ и институциите на државата. Владимир Талески е жртва на заканите кои СДСМ со месеци ги испраќа врз судиите кои само неколку часа откако Петре Шилегов се закани со поединечни лични тужби против нив, изрекоа мерка за која СЈО нема никакви одржливи аргументи со законска и логичка оправданост, рече Зоран Илиоски, пратеник од ВМРО-ДПМНЕ.
Од СДСМ пак побараа Талески да си поднесе оставака.
-ВМРО-ДПМНЕ наместо да се огради, уште еднаш се стави во одбрана на луѓе осомничени за криминал, на кои личниот интерес и профит им е во прв план и со тоа само докажа дека криминалното работење е нивна главна одлика.За доброто на Битола и битолчани, го повикуваме Владимир Талески во најкус можен рок да си поднесе оставка.На тој начин ќе се овозможи нормално функционирање на Општината во интерес на сите граѓани, рече Борче Корлевски, СДСМ-Битола.
Скопскиот кривичен суд му одреди 30 дневен притвор на Талески, кој е осомничен за случајот Транспортер што СЈО го отпочна пред 2 месеца. Битолскиот градоначалник е првоосомничен за злоупотреба на 360 илјади евра буџетски пари за превоз на ученици.