Партиските претставници на ВМРО-ДПМНЕ, СДСМ, ДУИ и ДПА пред денешните преговори кои се одвиваат во Клубот на пратеници, сите со свое видување за идеите на маса.
Според Никола Тодоров од ВМРО-ДПМНЕ, СДСМ постојано одбивал предлози а неговата партија била постојано конструктивна и секогаш давала предлози за конечно решение.
– Се разговара за две работи. Првата е по завршување на изборите да заврши Владата од Пржино и, втората, да не може да се прави злоупотреба и масовна партиска чистка во МВР, изјави Тодоров.
Од друга страна Радмила Шеќеринска потенцира дека ВМРО-ДПМНЕ бега од регуларни избори и од Договорот од Пржино.
– Сметаме дека на Македонија час поскоро ѝ требаат демократски и фер избори и затоа предлагаме решенија, а не отвораме нови прашања, вели Шекеринска, дополнувајќи дека според она што се случуваше изминативе два месеца и новите барања коишто беа измислени во последните 10-тина дена, јасно било дека ВМРО-ДПМНЕ бега од регуларни, фер и демократски избори, бега од Пржинскиот договор и бега од спроведување на се она што било ветено и во текот на минатата и во текот на оваа година.
Артан Груби од ДПА пак, вели разликите се минимални и можат да се надминат, а денеска да се постигне конечен договор.
– Разговорите се одвиваат во конструктивна атмосфера. Разликите се многу минимални и сме блиску до договор. Се надевам дека договор ќе постигнеме денеска или најдоцна утре, а единствената можна дата за избори оваа година е 11 декември, порача Груби.
На преговорите денеска кои се одвиваат во Клубот на пратеници присуствуваат претставници на Делегацијата на ЕУ и американскиот амбасадор Џес Бејли.