ДУИ попушти во однос на вработувањата на специјализантите. Директорите на болниците Албанци ги потпишале решенијата. Но, сега правната процедура за нивното вработување не може да се реализира бидејќи решенијата се потпишани еден месец подоцна од договорот. На Клиниката за детски болести каде што четворица специјализанти треба да си го решат егзистенцијалното прашање, велат дека вработувањата се заведени од 1 ви јули и не постои начин како тоа да се реши.
„Правнички не е завршена процедурата. Вработувањата се заведени од 1 ви јули, а економскиот директор потпиша пред два дена. Не постои друг начин освен да се поништи конкурсот“, изјави за НОВА Аспазија Софијанова, директорка на Клиниката за детски болести.
Економскиот директор Ридван Ибраими не објасни дали целта е да се поништи конкурсот. Само кратко рече дека сигурно ќе се најде начин да се среди проблемот.
„Не знам за другите директори, мене ми кажаа од Секретаријатот за здравство на ДУИ да ги потпишам решенијата. Сигурно ќе се среди тоа со датумот“, изјави Ибраими за НОВА.
Вкупно 28 специјализанти извисија бидејќи економските директори Албанци не сакаа да ги потпишат договорите, со образложение дека нема реципроцитет во изборот. Станува збор за болницата „Св. Наум охридски“ каде треба да бидат примени осум лекари, Клиниката за детски болести каде чекаат четворица лекари, како и во болниците во Куманово, Гостивар,Тетово и Струга.
Во Министерството за здравство пак, велат дека дека постепено се реализираат договорите од останатите установи, постапката е во завршна фаза и во најкраток рок ќе се финализира.
Со овој договор лекарите кои се на приватна специјализација, а работат и дежураат без да земат ниту денар ќе примаат просечна плата од 22 000 денари. Министерството за здравство им наложи на болниците, буџетот за нивните плати да го обезбедат болниците, а некои од директорите велат дека се немаат финансиски средства за тоа.
Од Асоцијацијата на специјализанти и млади лекари упатија писмо до министерот Тодоров и до директорите на болниците барајќи одговор зошто 28 лекари не можат да заснован работен однос од 1 јули како што е зацртано со договорот и да го остварат своето право како останатите нивни колеги.