Напаѓачите кои во јули изведоа терористички напади во Германија, претходно добивале упатства од припадници на Исламската држава во Саудиска Арабија. Ова го пренесуваат германските медиуми повикувајќи се на Сојузната канцеларија за борба против тероризмот.
Двајцата напаѓачи, 17 годишен бегалец од Авганистан, кој на 18 јули во воз со ноќ и секира тешко повреди повеќе патници во Баварија, а потоа настрада во судир со полицијата и 27 годишен бомбаш самоубиец, мигрант од Сирија, кој активираше експлозив непосредно пред концерт исто така во Баварија, претходно преку интернет добиле инструкции од Саудиска Арабија.
На напаѓачот од возот, засега непознато лице, му дало иснтрукции со автомобил да се залета во масата луѓе, на што тој одговорил дека не знае да вози. Тој подоцна сам одлучил нападот да го изведе со нож и секира врз патниците од локалниот воз.
Исто така, 27 годишниот Сириец една недела пред нападот, исто така преку интернет добил налог како да го изведе нападот меѓу публиката на отворен концерт.
Како што наведува „Шпигел онлајн“, напаѓачот требал да остави експлозив во публиката, а тој сам, во пропагандна цел на Исламската држава, имал задача да го сними целиот напад.
Според тие сознанија, очигледно е дека бомбата во ранецот на напаѓачот случајно се активирала, иако официјално истрагата за овој напад и натаму е во тек, пренесуваат германските медиуми.
Саудиска Арабија на германските органи им понуди помош во пронаоѓање на лицата од оваа земја кои на терористите им праќале инструкции.
„Ќе направиме се што е потребно за да се расветли позадината на овој случај“, порача владата на Саудиска Арабија на германските власти.