Во рок од три часа, денеска во Специјалното јавно обвинителство помина сослушувањето на лидерот на ДПА – Мендух Тачи, екс пратеничката и актуелен член на ДИК Силвана Бонева, како и лидерот на Партијата за целосна еманципација на Ромите – Самка Ибраимоски.
Сите тројца во Специјалното обвинителство се појавија без придружба на адвокати, а по завршувањето на одделните распити никој од нив не сакаше да сподели детали за предистражната постапка за која се повикани.
Ниту обвинителството не споделува детали за што се повикани тројцата политичари и дали даваат исказ како сведоци или осомничени. Не се знае ниту дали распитите се однесуваат на кривични дела од материјалите кои опозицијата ги обелодени јавно, или пак од бомбите кои не ги слушна јавноста.
СЈО прв го напушти Мендух Тачи, кој посочи дека ова не с емоменти кога треба да се даваат изјави. По завршувањето само кусо прокоментира:
„Кога правото зборува, политиката треба да молчи“, изјави Тачи.
Името на Мендух Тачи се споменува во осмата бомба на опозицијата кога во разговор со екс шефот на ДБК Сашо Мијалков договараат како да гласа во ДИК членот од редовите на ДПА – Бедредин Ибраими.
Разговор помеѓу Мендух Тачи и Сашо Мијалков
СМ: Мендух…
MТ:Кажи
СМ:Шо праиш?
МТ: Еве тука седам со луѓе
СМ:Имам една хитна ургенција за тебе.
МТ: Да
СМ: Може ли да гласате за нас сега за Струмица? Да не…
МТ: У Комисија?
СМ: Да у ДИК.
МТ: Да може еве да се јавам одма
СМ: Ама треба тоа сега одма да се почне сеа за 5 минути ние одложуваме малце…
МТ:Одма одма…Одма, одма се јавувам за минута и ти кажувам.
СМ: Ајде ајде.
Бонева пак, по распитот заврши дека кога во Собранието гласала за формирање на СЈО, не очекувала дека од предистражните постапки дека ќе се прават „медиумско-политички циркуси“.
-Во ниедна одредба од Законто за СЈО не стоеше дека пред истражната постапка која треба да биде тајна, ќе биде медиумско политички циркус. Сите вие сте сведоци на тој политичко – медиумски циркус. И јас сум убедена дека оние кои што ве повикале овде, ќе ви дадат изјава зошто сум повикана, за кој предмет и што се разговарало.“, изјави Бонева.
Екс пратеничката во опозициските бомби ја има во разговор со лидерот на ВМРО-ДПМНЕ Никола Груевски, на кој наводно му признава декa нема фирма во Струмица кoја не е изрекетирана.
Разговор помеѓу Силвана Бонева и Никола Груевски
СБ: Ќе треба да внимавате за рекетот и за се тоа што ми го кажувате, пресликано се е Струмица. Јас му кажав на Миле, за време на кампањата, он малку го излажа Ставревски за да не му писка. Оти тоа било пред Миле нели да стигне во Струмица, рекетот што се правел во фирмите во Струмица. Меѓутоа, рекетот не беше на почетокот на кампањата, туку негде до средина на кампањата течеше, и тоа ненормален рекет. Нема фирма што не е изрекетирана во Струмица. И многу лошо тоа се одрази на…
НГ: Кој рекетирал?
СБ: …на самата кампања. Славе Гошев.
НГ: Од кого?
СБ: Славе Гошев. Фирма нема што не е изрекетирана во Струмица…
НГ:Чекај, ама рекет, што е рекет?
СБ: И веќе е сосопственик на Вега…
НГ: Дали они барале спонзорство? Рекет е уцена, ако не ми дадеш, ќе те затворам. А, спонзорство е спонзорство. Му викаш ако можеш помогни ми.
СБ: Со се. Со закани, со закани и со таксување на најневозможни нешта за зимање пари. Со се и сешто. Немаше човек што….
Лидерот на ПЦЕР по распитот во СЈО денеска посочи дека тој сведочел за, како што рече, изборните криминали кои се спроведувале во општината Шуто Оризари, за кои што тој на 21. март пред Влада објави и аудио снимки.
-Ќе се докажува криминалот во изборната единица број два, каде што носител беше поранешната министерка за внатрешни работи Гордана Јанкулоска во 2011 и 2014 година. На пат сме да докажеме многу криминали и тоа ќе се докаже наскоро. Во интерес на истрагата не можам да кажам се, рече Ибраимоски.
Во првата „бомба“ што пред Владата ја обелоденија од ПЦЕР, се слушна како Јанкулоска вели дека добро ја завршиле работата во Шутка и во Куманово. И кажале како некоја Ромка, вработена во МВР, се понудила за пари да го намести Самка Имбраимовски во каква ситуација сакаат за тие да можат да сликаат.
Во еден дел од разговорот со соговорникот, Јанкулоска вели дека можеби тоа и ќе треба да го направат за да имаат некакви докази за секој случај.
Во останатите две „бомби“, Јанкулоска Ромите ги нарекува Цигани и вели „само да не добијат во прв круг, а во вториот, ако треба за уши ќе ги носат на гласање“.
IZJAVI SAMKA IBRAIMOVSKI I TONSKI PARCINJA OD… by 24vesti
Од Специјалното обвинителство претходно преку писмено соопштение посочија дека во периодот што следи ќе има „зголемена фреквенција на луѓе“ во Обвинителството, но поради тајноста на предистражните постапки тие нема да споделуваат детали за што се повикуваат лицата на разговор.
Оттаму посочија и дека постапките се однесуваат на досега објавените и необјавени неовластено прислушкувани разговори.