Финалистот во ЛШ ја игра последната сезона на „Висенте Калдерон“. Од наредната се сели на „Ле Пенета“, поранешен атлетски храм, што се реконструира по највисоки стандарди. Проектот чини 240 милиони евра и ќе биде прв со целосно ЛЕД осветлување
Новиот стадион на Атлетико Мадрид е во завршна фаза. Клубот го напушта „Висенте Калдерон“ и од сезоната 2017/18 ќе има нова адреса. Преселбата ја потврди и Енрике Серезо, претседател на клубот, кој направи и видео презентација на идното седиште на финалистот во Лигата на шампиони на УЕФА.
„Јорганџиите“ ќе направат трансфер на „Ла Пенета, поранешен атлетски храм, што се наоѓа во близина на „Висенте Калдерон“. Објектот е целосно реконструиран, ќе има капацитет од 70.000 седишта, направен е по сите стандарди и ќе биде прв со целосно ЛЕД осветлување.
„Новиот стадион ќе биде подготвен за помалку од една година. Напорно работиме со локалната влада и градските власти за инсталирање на нови светла, сервиси, паркинг, ресторани и други содржини. С` уште не сме одлучиле какво име да дадеме на објектот“, ја пренесува „Марка“ изјавата на Серезо.
Идејата за новиот дома на Атлетико Мадрид беше обелоденета во 2009 година. Првичните планови во меѓувреме претрпеа неколку измени, пред се, поради несогласувања за плацот со градските власти. Клубот веќе потпиша договор со „Филипс“, компанија за светлечки уреди, што значи дека сиот објект ќе биде „облечен“ во ЛЕД светилки и често ќе менува бои како што е случај со „Алијанц арена“ во Минхен. Целиот проект на клубот чини 240 милиони евра. Сегашниот негов дом, „Висенте Калдерон“, ќе биде биде урнат и на негово место ќе никне парк што ќе се вика Атлетико Мадрид.