Каква ќе биде политиката на САД, сега кога на претседателските избори победи републиканецот Доналд Трамп. По прогласувањето на Трамп дилеми се отворија и во Македонија. дали ќе има големи промени во економската и меѓународната политика? Каква ќе биде политиката на САД кон Македонија?
Поранешниот преговарач за името Никола Димитров, вели дека дури и најдобриот аналитичар во Вашингтон во овие моменти е збунет и нема лесно да се охрабри да предвиди каква ќе биде Америка под лидерството на Трамп.
„Убеден сум дека и најдобриот аналитичар во Вашингтон во овие моменти е збунет и нема лесно да се охрабри да предвиди каква ќе биде Америка под лидерството на Трамп. Прашањето е во која мера и колку брзо избраниот претседател Трамп од една страна, и системот на САД од друга страна, ќе се адаптираат и усогласат. Во однос на надворешната политика, основни насоки ќе бидат протекционизмот и изолационизмот“, вели Димитров.
Според него, ако нема изненадувања, Трамп ќе се бави пред се’ со домашна политика, а глобалниот ангажман на САД ќе се намали, можеби и драстично.
Што се однесува на интересот на САД за Македонија, па и воопшто за Балканот, Димитров смета дека ќе се намали.
„Интересот на идните САД за Македонија, и воопшто за Балканот, што и денес не е голем, ќе се намали дополнително. Секако, многу ќе зависи и од надворешно-политичкиот тим на Доналд Трамп, како и од случувањата и трендовите во Македонија и во регионот. Денешниот исход само дополнително потврдува дека ние во Македонија мора да си ја завршиме работата со сопствени сили. Интересот на САД за стабилен, демократски и просперитетен Балкан, интегриран во ЕУ и во НАТО ќе остане. Но, горивото и напорите по тој пат мора да бидат пред се’ домашни“, објаснува Димитров.