Општина Центар информира дека постапила по забелешките на Државната комисија за одлучување во втор степен во областа на инспекцискиот надзор и прекршочната постапка, за случајот со објектот на улица „Никола Вапцаров“ бр. 6 во сопственост на претседателот на Основен суд Скопје 1, Владимир Панчевски и неговото семејство.
Од Центар велат забелешките на Комисијата, кои биле од формален карактер, брзо се отстранети од страна на инспекцијата на општина Центар, и повторно е потврдено решението за отстранување на дивоградба од два ката на објектот.
На Панчевски и семејството им се даваат 15 дена рок за рушење.
– Со него (решението) се наредува на инвеститорите В.П. С.П. и Е.С., сите од Скопје, во рок од 15 дена од денот на приемот на решението, да ја отстранат градбата на улица “Никола Вапцаров“ бр. 6. Се бара отстранување на изградените 3-ти и 4-ти кат, како и дел од поткровјето кое е во градба и доградба. Надлежниот градежен инспектор на општина Центар констатирал дека објектот кој е од категорија А2-домување во станбени згради, целосно отстапува од заверениот основен проект за реконструкција и дека се изведуваат градежни работи без одобрение за градење, се вели во соопштението на Центар.
Оттаму дополнуваат дека доколку решението не се спроведе, односно градбата не се отстрани во определениот рок од 15 дена, на 16-тиот ден ќе се пристапи присилно административно извршување.
Панчевски и семејството во текот јули, август и септември, како соизвршители – инвеститори, без одобрение за градење, надградиле два ката на постоечка зграда во строгиот центар на Скопје, со вкупна површина од 551,86 м2.
Второстепената државна комисија, по жалбата на инвеститорите го поништи првостепеното решение и го врати на повторна постапка а за тоа најави и тужба за обесштетување.
Адвокатот на Панчевски во оваа постапка, Благоја Пеповски, вели во моментов не може да ја коментира одлуката на Центар бидејќи го немал добиено решението.