ЖРК Вардар во голем стил ги заврши настапите во групата Б во Лига на шампиони. „Црвено-црните“ ракометарки славеа на теренот на Лајпциг со 45:22 (22:9) и со 7 бода се селат во главната фаза во елитното натпреварување. Противници на вардарки во неа ќе бидат Будуќност, Мец и Турингер од групата А.
Најефикасна во составот на Давид Дејвис попладнево во Германија беше Александра Лакрабер со 10 гола. Радичевиќ постигна 5, по четири запишаа Човиќ, Ристовска, Лазович и Лекиќ, по трипати погодија Херем и Дамњановиќ, Мавсар, Илјина и Хмирова учествуваа со два погодока во петтиот триумф на ЖРК Вардар, втор со преку 40 реализации во оваа сезона. Во листата на стрелци не влегоа само Кликовац и голманките Лејно и Песоа, во комбинација за настап воопшто не беа Пенезиќ и Алтхаус.
Лигата на шампиони во женска конкуренција е пред две ипол месечна пауза. Од 4 до 18 декември се игра Европското првенство на кое домаќин е Шведска, а возбудувањата во клупската ракометна елита на стариот континент продолжуваат во последниот викенд во јануари.
Лајпциг – ЖРК Вардар 22:45 (9:22)
Сала: „Лајпциг арена“ бо Лајпциг. Гледачи: 1.500. Судии: Петер Бруновски и Владимир Канда од Словачка
Лајпциг: Крамарчик, Курцке, Рот, Мацуко, Еинарсдотир, Хубингер 4, Ланг, Ремер 5, Штурм 4, Роде 1, Вајсе 5, Телиг 3. Тренер: Норман Ренч
Седмерци: 4/5. Исклучувања: 6 минути
ЖРК Вардар: Лејно, Песоа, Радичевиќ 5, Кликовац, Херем 3, Мавсар 2, Дамњановиќ 3, Лазович 4, Илјина 2, Човиќ 4, Лакрабер 10, Хмирова 2, Лекиќ 4, Ристовска 4. Тренер: Давид Дејвис
Седмерци: 4/4. Исклучувања: 6 минути