По три часа дискусија зад затворени врати, претседателот на Судски совет, Зоран Караџоски, во однос на последните случувања во Основниот суд Скопје 1, во изјава за медиумите ги повика судиите сите проблеми да се решаваат внатре во институциите со цел, како што вели тој, да се заштити угледот на судството.
– Повикуваме на разумно решавање на состојбите внатре во судот и секој што има проблеми, да се обрати до Судскиот совет и сите проблеми да се решаваат институционално. Оној кој што смета дека некому му следува кривична одговорност, без многу давање во јавноста, треба да се обрати до Судскиот совет, изјави Караџоски.
Тој исто така информираше и дека Советот одлучил, кандидатите за претседател во Основниот суд Скопје 1, Врховниот суд, како и судовите во Тетово и Штип, да бидат оценувани вонредно. Тие ќе бидат оценувани за нивната работа во 2015 година па се до распишување на огласот за кандидати за претседатели на судовите, до 7.октомври 2016 година.
– Со измените на Законот за судски совет од 2015 година, оценувањето на судиите се врши на две години. Имајќи предвид дека последните оценувања биле во 2013 и во 2014 година, а сега е крај на 2016 година, ние одлучивме во согласност со законските одредби да направиме вонредно оценување, рече Караџоски.
Вонредното оценување ќе се врши со постапка како за редовно оценување, односно судиите ќе добијат решение на кое ќе имаат право на приговор.
Кандидати за нов претседател на Основниот суд Скопје се актуелниот претседател на судот, Владимир Панчевски, и судиите Иван Џолев и Владимир Туфегџиќ, додека за претседателското место во највисокиот суд во државата неофицијално кандидатури поднеле актуелната претседателка Лидија Неделкова, поранешниот претседател на судот, Јово Вангеловски, судијката Снежана Бајлозова и нејзината колешка од Врховниот суд, судијката Беса Адеми.
Основниот суд Скопје 1 е се поактуелен во јавноста изминативе неколку недели, откако претседателот Владимир Панчевски најпрво доби кривична пријава од судијата Иван Џолев , а се огласија и 13 судии кои поднесоа писмо во кое се вели дека претседателот на судот ја злоупотребувал веб-страницата на институцијата.
Работите во овој суд дополнително се заострија по инцидентот со вработените во судот и многубројните инспекции кои „чешлаа“ таму во текот на минатата недела.