Кошаркарите на МЗТ Скопје го доживеаја шестиот пораз во Еврокупот. Цедевита во Загреб вечерва славеше со 95:61 (26:17, 18:21, 27:9, 24:14) што е нејзин петти триумф во низа и најубедив во натпреварувањето досега. Хрватскиот состав се зацврсти на второто место во групата А и со себе во наредната фаза го повлече и Нижни Новгород, а „металците“ и математички загубија секакви шанси за минување на групата. Ботрајт со 20 поени и Џејмс со 15 беа најефикасни во домашниот состав, Лалиќ со 14 беше прв стрелец кај „металците“.
Одлучувачка за победникот беше третата четвртина што Цедевита ја доби со 18 поени разлика. Фуриозно влегоа домашните во вториот дел по 44:38 на полувремето и на крилјата на Томас, Ботрајт и Џејмс направија серија од 11:0, разлика што се зголемуваше како што одминуваше времето. МЗТ Скопје немаше расположени поединци за сериозен отпор. На тоа упатуваат и катастрофалните статистички показатели. Погодија само пет тројки од 24 обиди, изведоа само осум слободни фрлања со половичен ефект, забележаа 29 скока од кои само пет офанзивни и загубија 16 топки.
„Металците“ ќе имаат нова шанса за поправање на впечатокот во Еврокупот на 7 декември кога во Скопје ќе гостува Нижни Новгород.